विश्वकै सबैभन्दा ठूलो ई–कमर्स कम्पनी अमेजनले थप १६ हजार कर्मचारीलाई हटाउने घोषणा गरेको छ। यो निर्णय कम्पनीले गत वर्ष अक्टोबरदेखि सुरु गरेको पुनर्संरचना प्रक्रियाको निरन्तरता हो। यससँगै अमेजनमा गरिने कुल कर्मचारी कटौतीको संख्या ३० हजार पुगेको छ।

यसअघि अमेजनले १४ हजार पद कटौती गर्ने घोषणा गरेको थियो। तर पछिल्लो निर्णयसँगै कटौतीको दायरा थप विस्तार गरिएको हो। अमेजनका वरिष्ठ उपाध्यक्ष बेथ ग्यालेट्टीका अनुसार व्यवस्थापन तहहरू घटाउने, जवाफदेहिता बढाउने र कम्पनीभित्रको अनावश्यक नोकरशाही हटाउने उद्देश्यले कर्मचारी कटौती गरिएको हो।

उनका अनुसार कम्पनीले कर्मचारीहरूलाई छिटो निर्णय लिन सक्षम बनाउने र ग्राहक केन्द्रित नवीनता प्रवर्द्धन गर्ने लक्ष्य राखेको छ।

कोभिड–१९ महामारीपछि सन् २०२२–२३ मा अमेजनले २७ हजार कर्मचारी हटाएको थियो। त्यसयता यो कम्पनीको सबैभन्दा ठूलो कर्मचारी कटौती हो। मिडिया रिपोर्टअनुसार पछिल्लो कटौती मुख्यतया कर्पोरेट तथा कार्यालयस्तरका कर्मचारीहरूमा केन्द्रित हुनेछ।

हाल अमेजनमा विश्वभर करिब ३ लाख ५० हजार कार्यालय कर्मचारी कार्यरत छन्, जसमध्ये करिब १० प्रतिशत अर्थात् ३० हजारले जागिर गुमाउनेछन्। यद्यपि, कम्पनीले गोदाम र वितरण सञ्जालमा कार्यरत करिब १५ लाख कर्मचारीलाई यस कटौतीले असर नगर्ने स्पष्ट पारेको छ।

विज्ञहरूका अनुसार अमेजनले आर्टिफिसियल इन्टेलिजेन्स (एआई) क्षेत्रमा लगानी तीव्र रूपमा बढाइरहेकाले सोही अनुसार कार्यबल संरचना पुनःव्यवस्थित गरिरहेको हो। कम्पनीले प्रत्येक टोलीले आफ्ना क्षमताको निरन्तर मूल्याङ्कन गर्दै आवश्यक परे परिवर्तन गरिने जनाएको छ।

कुन–कुन विभागबाट कति कर्मचारी हटाइने भन्ने विवरण भने अमेजनले अझै सार्वजनिक गरेको छैन। कम्पनीले आगामी फेब्रुअरी ६, २०२५ मा पूर्ण वर्षको वित्तीय नतिजा सार्वजनिक गर्नेछ। सो अवसरमा आयोजना हुने सम्मेलन कलमार्फत कर्मचारी कटौती तथा भविष्यका योजनाबारे थप जानकारी दिने अपेक्षा गरिएको छ।