सरकारले राष्ट्रिय आर्थिक गणना २०८२ सञ्चालनका लागि ठूलो संख्यामा जनशक्ति माग गरेको छ ।

राष्ट्रिय तथ्याङ्क कार्यालयले सूचना प्रकाशित गर्दै करार सेवामा कुल ४ हजार ४ सय ३९ जना कर्मचारी भर्ना गर्ने जनाएको हो । गणनाका क्रममा स्थलगत तथ्याङ्क सङ्कलन तथा सुपरिवेक्षण कार्यका लागि ५ सय २६ जना सुपरिवेक्षक र ३ हजार ९ सय १३ जना गणक आवश्यक पर्ने कार्यालयले जनाएको छ ।

सूचनाअनुसार सुपरिवेक्षक पदका लागि न्यूनतम स्नातक तह उत्तीर्ण हुनुपर्नेछ भने गणक पदका लागि १०+२ वा प्रमाणपत्र तह उत्तीर्ण नेपाली नागरिकले आवेदन दिन सक्नेछन् ।

यो रोजगारी साढे दुई महिनाको करार अवधिका लागि हुनेछ । पारिश्रमिकतर्फ सुपरिवेक्षकले मासिक ३४ हजार ७३० रुपैयाँ र गणकले मासिक ३२ हजार ९०२ रुपैयाँ पाउनेछन् ।

योग्यता पुगेका इच्छुक व्यक्तिले सूचना प्रकाशित भएको मितिले २१ दिनभित्र अनलाइनमार्फत दरखास्त दिनुपर्नेछ । आवेदकको छनोट सर्टलिस्ट र अन्तर्वार्ताका आधारमा गरिने राष्ट्रिय तथ्याङ्क कार्यालयले जनाएको छ ।

आवेदन राष्ट्रिय तथ्याङ्क कार्यालयको आधिकारिक वेबसाइटमार्फत वा सूचनामा उल्लेख गरिएको क्यूआर कोड स्क्यान गरी गर्न सकिने व्यवस्था गरिएको छ ।