काठमाडौं–भद्रपुर उडान भरेको बुद्ध एयरको एक विमान अवतरणका क्रममा भद्रपुर विमानस्थलको रनवेबाट चिप्लिएको छ । विमानमा सवार सबै यात्रु र चालक दल भने सकुशल रहेका छन् ।

बुद्ध एयरका सूचना अधिकारी दिपेन्द्र कर्णका अनुसार उडान संख्या ९०१ अन्तर्गत ९एन–एएमएफ (कलसाइन ९एन–एमएफ) को एटीआर–७२ विमान अवतरणका क्रममा रनवेबाट केही भाग बाहिरिएको हो । विमानमा ५१ जना यात्रु सवार थिए ।

नेपाल नागरिक उड्डयन प्राधिकरणका प्रवक्ता ज्ञानेन्द्र भुलले सबै यात्रुको सुरक्षित उद्धार भइसकेको जानकारी दिए । घटनामा मानवीय क्षति नभएको र यात्रुहरूलाई विमानबाट बाहिर निकालिसकिएको उनले बताए ।

विमान रनवेबाट चिप्लिनुको कारणबारे प्राधिकरणले प्रारम्भिक छानबिन सुरु गरेको जनाएको छ । घटनापछि भद्रपुर विमानस्थलमा केही समय उडान प्रभावित भए पनि अवस्था सामान्य बनाउने प्रयास भइरहेको छ ।