उदयपुरको कटारी नगरपालिका–६ बगवतीका गङ्गाबहादुर दर्नाल वैदेशिक रोजगारीका लागि दुबई उडेको चार महिनापछि भारतको दिल्लीमा बेवारिसे अवस्थामा फेला परेका छन् ।

वैदेशिक रोजगार उद्धार नेपालले दर्नाललाई उद्धार गरी हाल काठमाडौँ ल्याएर शिक्षण अस्पतालमा उपचार गराइरहेको छ । उद्धार नेपालका अध्यक्ष इन्द्रलाल गोलेका अनुसार एक भारतीय नागरिकले सामाजिक सञ्जालमार्फत दर्नालको अवस्थाबारे जानकारी सार्वजनिक गरेपछि तत्काल उद्धार प्रक्रिया अघि बढाइएको हो ।

दर्नाल दुबई जान हिँडे पनि लामो समयसम्म परिवारको सम्पर्कमा नआएपछि खोजी सुरु गरिएको थियो । म्यानपावर कम्पनीमार्फत बुझ्दा स्वास्थ्यमा समस्या आएपछि एयरलाइन्सले उनलाई दिल्ली ट्रान्जिट गरी अस्पतालमा छाडेको जानकारी दिएको थियो । तर परिवारले अस्पतालमा खोजी गर्दा उनी फेला नपरेको जनाइएको थियो ।

कटारी नगरपालिका–६ का वडाध्यक्ष प्रेम मगरले दर्नालको आर्थिक अवस्था कमजोर रहेकाले वडाबाट निःशुल्क उपचारका लागि आवश्यक प्रक्रिया पूरा गरी नगरपालिकामा सिफारिस पठाइसकेको बताए । “बेपत्ता भएपछि खोजीका लागि धेरै पहल गरियो, तर भेटिएको थिएन,” उनले भने, “सामाजिक सञ्जालमै दिल्लीमा अलपत्र परेको खबर आएपछि उद्धार गरेर काठमाडौँ ल्याएर उपचार भइरहेको छ।”

बेवारिसे अवस्थामा भेटिएका दर्नालको खुट्टाको औँला समेत काटिइसकेको अवस्थामा फेला परेको जनाइएको छ । उनी भारत ट्रान्जिट हुँदा कसरी छुटे वा कसरी दिल्लीमा अलपत्र परे भन्ने विषय अझै खुल्न नसकेको वडाध्यक्ष मगरले जानकारी दिए ।

यस घटनाले वैदेशिक रोजगारीका क्रममा श्रमिकहरूको सुरक्षा, ट्रान्जिट व्यवस्थापन र जिम्मेवार निकायहरूको भूमिकाप्रति गम्भीर प्रश्न खडा गरेको स्थानीयले बताएका छन् ।