यस साता नेपाल स्टक एक्सचेञ्ज (नेप्से) परिसूचक करिब साढे १ प्रतिशतले बढेर बन्द भएको छ । गत साता २५८५.८७ विन्दुमा बन्द भएको नेप्से परिसूचक यो साता १.३६ प्रतिशत अर्थात् ३५.०५ अंकले वृद्धि भई २६२०.९२ विन्दुमा पुगेको हो ।

यो साता बजार चार कारोबार दिन खुलेको थियो । जसमध्ये दुई दिन नेप्से बढेको थियो भने दुई दिन घटेको थियो । नेप्सेसँगै सेन्सेटिभ इण्डेक्स ५.७६ अंक, फ्लोट इण्डेक्स २.५७ अंक र सेन्सेटिभ फ्लोट इण्डेक्स १.८२ अंकले बढेका छन् ।

नेप्से परिसूचकसँगै कारोबार रकम पनि उल्लेख्य रूपमा बढेको छ । गत साता दैनिक औसत ३ अर्ब ६७ करोड रुपैयाँको सेयर कारोबार भएको बजारमा यस साता दैनिक औसत ५ अर्ब ३ करोड रुपैयाँको सेयर किनबेच भएको छ । यो रकम गत साताको तुलनामा ३७.१२ प्रतिशतले बढी हो । यस साता दैनिक औसत सेयर संख्या २८.९७ प्रतिशतले बढेको छ भने दैनिक औसत कारोबार संख्या १.४५ प्रतिशतले घटेको छ ।

यस साता नेप्सेको कुल बजार पूँजीकरण पनि करिब साढे १ प्रतिशतले बढेको छ । गत साताको अन्तिम कारोबार दिन ४३ खर्ब ४१ अर्ब रुपैयाँ रहेको कुल बजार पूँजीकरण, यस साता ५८ अर्ब रुपैयाँले बढेर ४४ खर्ब रुपैयाँ पुगेको छ ।

१३ उपसमूहमध्ये यस साता १२ उपसमूहको परिसूचक बढेको छ भने एक उपसमूहको परिसूचक घटेको छ । उत्पादन तथा प्रशोधन उपसमूहको परिसूचक सबैभन्दा बढी ३.०९ प्रतिशतले बढेको छ । गत साता ८२८६.६६ विन्दुमा बन्द भएको उक्त उपसमूह २५६.१४ अंकले उक्लिँदै ८५४२.८० विन्दुमा पुगेको हो । जीवन बीमा उपसमूहको परिसूचक भने सबैभन्दा कम ०.८० प्रतिशतले मात्र बढेको छ ।

यस साता व्यापार उपसमूहको परिसूचक ०.६७ प्रतिशतले घट्दै सबैभन्दा कमजोर प्रदर्शन गर्ने उपसमूह बनेको छ । गत साता ३७८३.३८ विन्दुमा बन्द भएको सो उपसमूह २५.३६ अंक घटेर ३७५८.०२ विन्दुमा झरेको छ ।

समग्रमा, नेप्से परिसूचक र कारोबार रकम दुवैमा सुधार देखिनुले लगानीकर्ताको मनोबल विस्तारै बढ्दै गएको संकेत गरेको बजार विश्लेषकहरूले बताएका छन् ।