चालु आर्थिक वर्ष २०८२/८३ को मङ्सिर मसान्तसम्ममा पूर्वीनाका काँकरभिट्टाबाट साढे सात अर्ब रुपैयाँभन्दा बढी मूल्यको पेट्रोलियम पदार्थ आयात भएको छ। मेची भन्सार कार्यालयका अनुसार उक्त अवधिमा पेट्रोल, डिजेल, एलपी ग्यास, एटीएफ र मट्टितेल गरी कुल रु सात अर्ब ८४ करोड ४० लाख २३ हजार बराबरको पेट्रोलियम पदार्थ आयात भएको हो।

मेची भन्सार कार्यालयका सूचना अधिकारी ईश्वरकुमार हुमागाईँका अनुसार अघिल्लो आर्थिक वर्ष २०८१/८२ को सोही अवधिको तुलनामा पेट्रोलियम पदार्थको आयात रु २३ करोड ५२ लाख ७० हजार, अर्थात् ३.१० प्रतिशतले वृद्धि भएको छ। आयात बढेसँगै यस क्षेत्रबाट प्राप्त राजस्वमा पनि सुधार देखिएको छ। उनका अनुसार पेट्रोलियम पदार्थबाट संकलित राजस्व २.५० प्रतिशतले बढ्दै रु नौ करोड ४२ लाख ९५ हजार थप भएको छ।

कार्यालयको तथ्याङ्कअनुसार चालु आर्थिक वर्षका पहिलो पाँच महिनामा मात्र पेट्रोलियम पदार्थ आयातबाट रु तीन अर्ब ८० करोड ५८ लाख ६४ हजार राजस्व संकलन गरिएको छ। यस अवधिमा रु तीन अर्ब ८२ करोड ७० लाख मूल्य बराबरको ४३ हजार १६० किलोलिटर पेट्रोल आयात भएको छ भने रु दुई अर्ब ५३ करोड १६ लाख मूल्यका २६ हजार १२० किलोलिटर डिजेल भित्रिएको छ।

त्यसैगरी, पाँच महिनाको अवधिमा रु एक अर्ब एक करोड ६० लाख मूल्यका १० हजार ४८० मेट्रिक टन एलपी ग्यास, रु ३२ करोड ८२ लाख मूल्यको तीन हजार ५८० किलोलिटर एटीएफ तथा रु छ करोड ३१ लाख मूल्यका ६८० किलोलिटर मट्टितेल आयात भएको भन्सार कार्यालयले जनाएको छ।

पूर्वीनाकाबाट हुने पेट्रोलियम पदार्थको आयात र त्यसबाट प्राप्त राजस्वमा देखिएको यो वृद्धि आर्थिक गतिविधि विस्तार र ऊर्जा खपत बढ्दो क्रममा रहेको संकेतका रूपमा हेरिएको छ।