बैतडीमा यात्रुबाहक बस दुर्घटना हुँदा चालकसहित १७ जना घाइते भएका छन्। पाटन नगरपालिका–९, गैराखानस्थित दशरथचन्द राजमार्गमा शुक्रबार दिउँसो दुर्घटना भएको हो।

धनगढीबाट बैतडीतर्फ जाँदै गरेको सु.प.प्र.०१–००१ ख ३९६३ नम्बरको बस अनियन्त्रित भई सडकबाट करिब २०० मिटर तल खसेको प्रहरीले जनाएको छ।

दुर्घटनामा घाइते भएका १७ जनामध्ये दुई जनाको अवस्था गम्भीर रहेको छ। गम्भीर घाइतेहरूलाई थप उपचारका लागि अस्पताल पठाउने तयारी भइरहेको प्रहरीले जनाएको छ।

प्रहरी, स्थानीयवासी र उद्धार टोलीले घटनास्थलमा पुगेर घाइतेहरूको उद्धार तथा उपचारका लागि अस्पताल पठाउने काम गरिरहेका छन्।

दुर्घटनाको कारण खुल्न नसकेको र घटनाबारे थप अनुसन्धान भइरहेको जिल्ला प्रहरीले जनाएको छ।