सूर्यकुण्ड हाइड्रो इलेक्ट्रिक कम्पनी लिमिटेडले सर्वसाधारणका लागि आजदेखि खुला गरेको प्रारम्भिक सार्वजनिक निष्कासन (आइपिओ) मा देखिएको प्राविधिक समस्या समाधान भएको छ। आइपिओमा प्रतिकित्ता शेयरको मूल्य १०० रुपैयाँ हुनुपर्नेमा १० रुपैयाँ देखिएपछि केही समयका लागि आवेदन प्रक्रिया बन्द गरिएको थियो।

निष्कासन तथा बिक्री प्रबन्धक कुमारी क्यापिटलका अनुसार सो त्रुटि सच्याइएपछि पुनः आवेदन दिन मिल्ने व्यवस्था गरिएको छ। यसअघि परेको सबै आवेदन स्वतः रद्द गरिएको हुँदा लगानीकर्ताहरूले अनिवार्य रूपमा नयाँ आवेदन दिनुपर्नेछ।

कम्पनीको आइपिओमा आवेदन दिने समय आज अपराह्न १२ः३० बजेदेखि माघ २१ गते राति ८ बजेसम्म तोकिएको छ। सूर्यकुण्ड हाइड्रोले सर्वसाधारणका लागि १०० रुपैयाँ अंकित दरमा कुल ५ लाख ७२ हजार ४३१ कित्ता शेयर निष्कासन गरेको हो।

कम्पनीले जारी पूँजी ६८ करोड ९६ लाख ७४ हजार ४०० रुपैयाँको २० प्रतिशत बराबर हुने १३ करोड ७९ लाख ३५ हजार रुपैयाँको १३ लाख ७९ हजार ३५० कित्ता शेयर निष्कासन गर्ने अनुमति पाएको थियो। जसमध्ये सामूहिक लगानी कोषका लागि ३४ हजार ४८४ कित्ता र कर्मचारीका लागि १३ हजार ७९३ कित्ता शेयर छुट्याइएको छ।

यस आइपिओमा लगानीकर्ताले न्यूनतम १० कित्ता र अधिकतम ५० हजार कित्तासम्म आवेदन दिन सक्नेछन्। आवेदन नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थाका शाखाहरू तथा सीडीएससीको ‘मेरो शेयर’ प्रणालीमार्फत दिन सकिनेछ।

सूर्यकुण्ड हाइड्रोले सञ्चालन गरिरहेको ११ मेगावाट क्षमताको माथिल्लो तादी खोला जलविद्युत आयोजनाको कुल लागत २ अर्ब ३६ करोड ८४ लाख ४० हजार रुपैयाँ रहेको छ। यस आयोजनाको प्रतिमेगावाट लागत २१ करोड ५३ लाख १२ हजार ७२७ रुपैयाँ रहेको कम्पनीले जनाएको छ।