साताको चौथो कारोबार दिन बुधबार (माघ २१) सेयर बजार सामान्य करेक्सनको चरणमा देखिएको छ। अघिल्लो दिन दोहोरो अंकले घटेको बजार आज भने झिनो अंकले मात्र ओरालो लागेको हो।

नेपाल स्टक एक्सचेन्ज (नेप्से) परिसूचक आज १.६४ अंकले घट्दै २६८१.५० विन्दुमा बन्द भएको छ। मंगलबार नेप्से १२.५८ अंकले घटेको थियो। कारोबार रकमतर्फ पनि संकुचन देखिएको छ। मंगलबार ८ अर्ब ६३ करोड रुपैयाँको कारोबार भएकामा बुधबार ७ अर्ब ४९ करोड रुपैयाँभन्दा बढीको सेयर किनबेच भएको छ, जुन अघिल्लो दिनको तुलनामा करिब १ अर्ब १३ करोड रुपैयाँ कम हो।

आजको कारोबारमा ३२६ कम्पनीका सेयर खरिद–बिक्री भएका छन्। तीमध्ये ११३ कम्पनीको सेयर मूल्य बढेको, १३४ कम्पनीको घटेको र १३ कम्पनीको मूल्य स्थिर रहेको नेप्सेले जनाएको छ।

यसदिन केही जलविद्युत् कम्पनीका सेयरमा भने उत्साह देखिएको छ। कालिञ्चोक दर्शन, सुपरमाई हाइड्रोपावर, सुपरमादी हाइड्रोपावर र आँखुखोला जलविद्युत् कम्पनीको सेयर मूल्यमा सकारात्मक सर्किट लाग्दै १० प्रतिशतले वृद्धि भएको छ।

समग्रमा बजारमा लगानीकर्ताहरू अझै पनि ‘पर्ख र हेर’को अवस्थामा देखिएका छन्। पछिल्ला दिनहरूमा आएको तीव्र उतार–चढावपछि बजार सन्तुलन खोज्ने चरणमा प्रवेश गरेको विश्लेषकहरूको भनाइ छ।