शिक्षामन्त्री महावीर पुनले विदेशी कलेजहरूसँग सम्बन्धन लिएर नेपालमै पढाइ गराउने केही कलेज तथा विदेश पढ्न पठाउने नाममा खोलिएका कन्सल्टेन्सीहरूको छानबिन प्रक्रिया अघि बढेको बताएका छन्।

मन्त्री पुनका अनुसार ती कलेज र कन्सल्टेन्सीहरूले झुटो आश्वासन र प्रलोभन देखाएर नेपाली विश्वविद्यालयको भन्दा पनि कम गुणस्तरको शिक्षा दिने, साथै विद्यार्थीहरूलाई अलपत्र पार्ने गरेको भन्दै शिक्षा मन्त्रालयमा धेरै उजुरी आएका छन्। यस्ता गतिविधिको रोकथाम र सुधारका लागि मन्त्रालय सक्रिय रूपमा अघि बढिसकेको उनले स्पष्ट पारे।

उनले भने, “विदेशी कलेजहरूसँग सम्बन्धन लिएर नेपालमै पढाउने केही कलेजहरू र विदेशमा पढ्न पठाउने भनेर खोलिएका केही कन्सल्टेन्सीहरूले झुटो आश्वासन र प्रलोभन दिई नेपाली विश्वविद्यालयको भन्दा पनि कम गुणस्तरको शिक्षा दिने र विद्यार्थीहरूलाई अलपत्र पार्ने धेरै उजुरी आएका छन्। त्यसलाई रोकथाम र सुधार गर्न शिक्षा मन्त्रालय अघि बढिसकेको छ।”

शिक्षामन्त्री पुनले ठगीमा परेका विद्यार्थीहरूलाई प्रमाणसहित लिखित उजुरी दिन आग्रहसमेत गरेका छन्। मन्त्रालयले प्राप्त उजुरीका आधारमा आवश्यक छानबिन गरी दोषीमाथि कारबाही प्रक्रिया अघि बढाइने उनको भनाइ छ।

पछिल्लो समय विदेशी डिग्रीको नाममा नेपालमै अध्ययन गराउने कलेज र कन्सल्टेन्सीको संख्या बढ्दै जाँदा विद्यार्थी र अभिभावकबीच चिन्ता बढेको सन्दर्भमा मन्त्रालयको कदमलाई महत्वपूर्ण रूपमा हेरिएको छ।