पछिल्ला दिनमा नियमित रूपमा बजार अनुगमन गर्दै स्वच्छता र उपभोक्ता हित कायम गराउन अग्रसर वाणिज्य, आपूर्ति तथा उपभोक्ता संरक्षण विभागले तीन वटा फर्मलाई नगद जरिवानासहित कारबाही गरेको छ।

विभागका अनुसार काठमाडौँको कोटेश्वरस्थित होटल ब्लिस्फुल प्रालिलाई ५० हजार रुपैयाँ, गोल्मादेवी भोजनालय एण्ड लजलाई ५ हजार रुपैयाँ र चडेश्वरी नेवारी खाजा घरलाई ५ हजार रुपैयाँ जरिवाना गरिएको हो। ती फर्महरूलाई उपभोक्ता संरक्षण ऐन, २०७५ को दफा ३८ बमोजिम कसुर गरेको ठहर गर्दै सोही ऐनको दफा ३९ (१) अनुसार कारबाही गरिएको विभागले जनाएको छ।

यसका साथै विभागले अन्य ११ वटा फर्मको स्थलगत अनुगमन तथा निरीक्षण गरी आवश्यक सुधारात्मक निर्देशन दिएको छ। अनुगमनका क्रममा स्वच्छता, मूल्यसूची, खाद्य गुणस्तर र उपभोक्ता अधिकारसम्बन्धी मापदण्डमा ध्यान दिन निर्देशन दिइएको विभागले स्पष्ट पारेको छ।

विभागले कालोबजारी नियन्त्रण, अखाद्य वस्तुको बिक्री वितरणमा रोक लगाउने तथा उपभोक्ता संरक्षणसम्बन्धी कानुनको प्रभावकारी कार्यान्वयन गर्ने उद्देश्यका साथ नियमित रूपमा बजार अनुगमन जारी राख्ने जनाएको छ। उपभोक्ताको स्वास्थ्य र हितसँग खेलवाड गर्ने व्यवसायीलाई कडाभन्दा कडा कारबाही गरिने चेतावनीसमेत विभागले दिएको छ।