सन् २०२६ को जनवरी महिनामा नेपालमा अन्तर्राष्ट्रिय पर्यटक आगमन उल्लेखनीय रूपमा बढेको छ। नेपाल पर्यटन बोर्डका अनुसार जनवरीमा नेपाल भित्रिने अन्तर्राष्ट्रिय पर्यटकको संख्या ९२ हजार ५७३ पुगेको छ, जुन सन् २०२५ को जनवरीको तुलनामा १५.७ प्रतिशतले बढी हो।

कोभिड–१९ महामारीअघि सन् २०१९ को जनवरी महिनासँग तुलना गर्दा समेत पर्यटक आगमन १४ प्रतिशतले वृद्धि भएको बोर्डले जनाएको छ। यसले अन्तर्राष्ट्रिय पर्यटन क्षेत्रमा नेपाल क्रमशः पुनः लयमा फर्किँदै गएको संकेत गरेको छ।

सन् २०२६ को पहिलो महिनाको तथ्यांकअनुसार नेपाल आउने पर्यटकमध्ये भारत शीर्ष स्थानमा रहेको छ। जनवरीमा भारतबाट २६ हजार ६२४ पर्यटक नेपाल आएका छन्, जुन कुल आगमनको २८.८ प्रतिशत हो। त्यसपछि चीनबाट ९ हजार १०१ (९.८ प्रतिशत), संयुक्त राज्य अमेरिकाबाट ८ हजार ४०६ (९.१ प्रतिशत), बंगलादेशबाट ५ हजार ८१४ (६.३ प्रतिशत) र अस्ट्रेलियाबाट ४ हजार ९५७ (५.४ प्रतिशत) पर्यटक नेपाल भित्रिएका छन्।

क्षेत्रगत रूपमा हेर्दा दक्षिण एसियाली मुलुकहरू (सार्क) बाट ३९.३ प्रतिशत पर्यटक नेपाल आएका छन्। अन्य एसियाली देशबाट २६.१ प्रतिशत, युरोपबाट १२.३ प्रतिशत, अमेरिकाबाट १०.८ प्रतिशत र ओसियानियाबाट ५.७ प्रतिशत पर्यटक आगमन भएको छ। मध्यपूर्वबाट १ प्रतिशत र अफ्रिकाबाट ०.४ प्रतिशत पर्यटक नेपाल आएका छन् भने अन्य क्षेत्रको हिस्सा ४.५ प्रतिशत रहेको छ।

नेपाल पर्यटन बोर्डका प्रमुख कार्यकारी अधिकृत (सीईओ) दीपकराज जोशीले सन् २०२६ को जनवरीको तथ्यांकले अन्तर्राष्ट्रिय पर्यटन बजारमा नेपालप्रतिको विश्वास क्रमशः मजबुत हुँदै गएको संकेत गरेको बताएका छन्।

उनका अनुसार पछिल्ला वर्षहरूमा गरिएको गन्तव्य प्रवर्द्धन, हवाई सम्पर्क विस्तार, साहसिक तथा सांस्कृतिक पर्यटनप्रतिको बढ्दो आकर्षण र अन्तर्राष्ट्रिय बजारमा नेपालको सकारात्मक छवि निर्माण हुनु आगमन वृद्धिका प्रमुख कारण हुन्। यी उत्साहजनक तथ्यांकहरूले नेपाललाई ‘लाइफटाइम एक्सपिरियन्स डेस्टिनेसन’ का रूपमा स्थापित गर्दै लैजाने आधार बनेको उनले बताए।