राष्ट्रिय स्वतन्त्र पार्टी (रास्वपा) ले आगामी उपनिर्वाचनदेखि नै विदेशमा रहने नेपालीका लागि मतदानको व्यवस्था सुनिश्चित गर्न माग गरेको छ ।

शनिबार निर्वाचन आयोगले आयोजना गरेको सर्वदलीय छलफलमा रास्वपका सहमहामन्त्री तथा लुम्बिनी प्रदेश इन्चार्ज विपिनकुमार आचार्यले यस्तो माग गरेका हुन् । उनले आगामी कातिक १७ गते हुने रुपन्देही–३ को उपनिर्वाचनबाटै विदेशबाट मतदानको व्यवस्था निर्वाचन आयोगलाई आग्रह गरे ।

‘निर्वाचन हुन अझै तीन महिना बाँकी छ । यो अवधि एउटा निर्वाचन क्षेत्रमा विदेशबाट मतदान गर्ने व्यवस्थाको टेक्निकल र लिगल सिस्टम स्क्र्याचबाटै बनाएर परीक्षण गर्ने पर्याप्त समय हो’ उनले भने, ‘नोट चल्ने तर भोट नचल्ने अवस्था अन्त्य गर्न आयोग साँच्चै नै गम्भीर हो भने यो उपनिर्वाचनबाटै आयोगले त्यस दिशामा आफूले गरेको काम देखाओस् ।’

तीन महिनाको अवधिमा एउटा निर्वाचन क्षेत्रमा पनि विदेशबाट मतदान गराउने व्यवस्था गर्न नसक्ने भए भन्न चुनौती दिँदै उनले भने, ‘एउटा निर्वाचन क्षेत्रमा समेत आयोगले सक्दैन भने आयोगले स्पष्ट भनोस् हामी ८४ त के ८९ सालको निर्वाचनमा पनि विदेशबाट मतदानको व्यवस्था गर्दैनौँ वा गर्न सक्दैनौँ ।’