ताजा
लोकप्रिय
नेपाल विद्युत् प्राधिकरणले आज राजधानीका केही क्षेत्रहरूमा दुई घण्टा विद्युत् आपूर्ति बन्द हुने जानकारी गराएको छ। प्राधिकरणले सूचना जारी गर्दै पानीपोखरी फिडर र हस्पिटल फिडरअन्तर्गतका क्षेत्रमा बिहान ११ बजेदेखि अपराह्न १ बजेसम्म बिजुली कटौती हुने जनाएको हो।
प्राधिकरणका अनुसार लाजिम्पाट, पानीपोखरी, महाराजगञ्ज, त्रिभुवन विश्वविद्यालय शिक्षण अस्पताल (टिचिङ) आसपासका क्षेत्रमा विद्युत् आपूर्ति अवरुद्ध हुनेछ।
यस्तै, राष्ट्रपति भवन, नेपाल प्रहरीको केन्द्रीय अनुसन्धान व्यूरो र नेपाल प्रहरी अस्पताल क्षेत्र पनि कटौती प्रभावित क्षेत्रमा पर्ने छन्।
काठमाडौँ उपत्यका मध्यम तथा उत्तर वितरण प्रणाली सुदृढीकरण आयोजनाअन्तर्गत वितरण प्रणाली भूमिगत गर्ने कार्य भइरहेकोले, भूमिगत केवल जडानका लागि आज विद्युत् बन्द गरिन लागेको प्राधिकरणको महाराजगञ्ज वितरण केन्द्रले जनाएको छ।
यदि कार्य निर्धारित समयभन्दा अगाडि सम्पन्न भयो भने विद्युत् आपूर्ति सामान्य रूपमा पुनः सुरु हुने भनिएको छ।
