कृषि विकास बैंक लिमिटेडको ५९औँ वार्षिकोत्सवको अवसरमा बैंक व्यवस्थापन र बैंकमा क्रियाशील युनियनबीच मैत्रीपूर्ण फुटसल खेल सम्पन्न भएको छ।

बैंक व्यवस्थापन, कर्मचारी तथा युनियनबीच आपसी भाइचारा, आत्मीयता र सहकार्य अभिवृद्धि गर्ने उद्देश्यले २०८२ माघ ३ गते आयोजना गरिएको उक्त खेलमा दुवै समूहले ४–४ गोल गर्दै बराबरीमा टुंग्याएका हुन्।

खेलमा बैंक व्यवस्थापनको तर्फबाट प्रमुख कार्यकारी अधिकृत गोविन्द गुरुङ, उप–महाप्रबन्धकहरू तथा विभिन्न विभागीय प्रमुखहरूको उल्लेखनीय सहभागिता रहेको थियो। त्यसैगरी, बैंकमा क्रियाशील विभिन्न युनियनका अध्यक्षहरू तथा प्रतिनिधिहरूको पनि उत्साहजनक उपस्थिति रहेको थियो।

उत्साहपूर्ण र सौहार्दपूर्ण वातावरणमा सम्पन्न उक्त खेलले बैंकभित्रको आपसी समझदारी, सहकार्य र सकारात्मक सम्बन्धलाई थप मजबुत बनाएको सहभागीहरूले बताएका छन्। कृषि विकास बैंक लिमिटेड नेपाल सरकारको स्वामित्वमा सञ्चालित देशकै अग्रणी विकास बैंक हो।