चिनियाँ कम्युनिष्ट पार्टीको उच्चस्तरीय टोली भोलि काठमाडौं आइपुग्ने भएको छ। बदलिँदो अन्तर्राष्ट्रिय शक्ति सन्तुलन, जटिल बन्दै गएको भू–राजनीति, नेपालको अस्थिर राजनीतिक अवस्था र आसन्न प्रतिनिधिसभा निर्वाचनको सन्दर्भमा चिनियाँ टोलीको नेपाल आगमनलाई अर्थपूर्ण रूपमा हेरिएको छ।

चिनियाँ कम्युनिष्ट पार्टीको अन्तर्राष्ट्रिय विभाग अन्तर्गत नेपाल मामिला प्रमुख झेङ युहा (सरला) को नेतृत्वमा टोली नेपाल आउन लागेको हो। टोलीले तीन दिन नेपाल बसाइँ गर्ने कार्यक्रम रहेको छ। यस अवधिमा उच्चस्तरीय राजनीतिक नेतृत्व तथा सरकारी तहका जिम्मेवार व्यक्तिसँग भेटघाट हुने भरपर्दो स्रोतले जनाएको छ।

टोलीले छिमेकी मुलुकहरूसँग बढ्दै गएको अविश्वास, क्षेत्रीय शक्ति सन्तुलन र नेपालको समग्र राजनीतिक अवस्थाबारे अध्ययन गर्ने जनाइएको छ। साथै, नेपालका विभिन्न राजनीतिक शक्तिसँग सौहार्दपूर्ण भेटघाट गर्दै आपसी सम्बन्धलाई थप सुदृढ बनाउने उद्देश्य पनि भ्रमणको मुख्य एजेन्डा रहेको बताइएको छ।

नेपालको दीर्घकालीन राजनीतिक स्थिरताका लागि सम्भावित समाधानका विषयमा चीनले आफ्ना सुझाव राख्ने बताइएको छ। आगामी फागुन २१ गते हुने प्रतिनिधिसभा निर्वाचनको सफलताका लागि शुभकामना आदान–प्रदान पनि चिनियाँ टोलीको भ्रमणको एक महत्वपूर्ण पक्ष रहनेछ।