गत असार २४ गते आएको भीषण बाढीले क्षतिग्रस्त बनेको रसुवागढीस्थित मितेरी पुलको पुनर्निर्माण सम्पन्न भएसँगै आइतबारदेखि रसुवागढी नाका पुनः सञ्चालनमा आउने भएको छ। चिनियाँ पक्षले शनिबार सूचना जारी गर्दै आइतबारदेखि सीमापार ढुवानीमा संलग्न चालक तथा यात्रुलाई नाकाबाट आवतजावत गर्न अनुमति दिने जनाएको हो।

सूचनाअनुसार मितेरी बेलिब्रिज पुलको निर्माण कार्य पूरा भइसकेको र प्राविधिक निरीक्षणसमेत पास भइसकेकाले अब सीमापार आवागमनका लागि कुनै अवरोध नरहने बताइएको छ। साथै सबै सम्बन्धित पक्षलाई आवश्यक तयारी पूरा गरी सवारी साधन लोडलगायतका अग्रिम व्यवस्था गर्न आग्रह गरिएको छ।

जनवरी १ देखि भन्सार निरीक्षणपछि मात्र आवागमन

चिनियाँ पक्षका अनुसार आगामी जनवरी १ देखि भित्रिने तथा बाहिरिने सबै सवारी साधनको भन्सार कार्यालयबाट निरीक्षण गरी मात्रै आवागमन अनुमति दिइनेछ। सो अवधिमा एकतर्फी पालैपालो आवागमन प्रणाली कडाइका साथ लागू गरिने सूचनामा उल्लेख छ।

सडक मर्मतका कारण आधा दिन मात्र सञ्चालन

जी२१६ सीमा क्षेत्रमा सडक कालोपत्रेको काम भइरहेकाले जनवरी १ देखि अर्को वर्षको जनवरी ८ सम्म नाका आधा दिन मात्र सञ्चालन हुने भएको छ। यस अवधिमा चिनियाँ समयअनुसार बिहान ९ बजेदेखि दिउँसो २ बजेसम्म मात्रै आवागमन खुला रहने र बाँकी समयमा दुवै तर्फबाट सवारी आवागमन नियन्त्रण गरिने बताइएको छ।

२०७६ देखि सञ्चालनमा आएको पुल बाढीले बगाएको थियो

२०७६ साल जेठदेखि सञ्चालनमा आएको मितेरी पुल गत असार २४ को बाढीले बगाएपछि नेपाल-चीनबीचको महत्वपूर्ण सडक सम्पर्क पूर्ण रूपमा बिच्छेद भएको थियो। उक्त पुल चिनियाँ लगानीमा निर्माण भएको हो।

नाका पुनः सञ्चालनमा आएपछि रसुवागढी नाकामार्फत हुने व्यापार, ढुवानी तथा स्थानीय आवागमन पुनर्जीवित हुने अपेक्षा गरिएको छ।