रणवीर सिंहको चलचित्र ‘धुरन्धर’ प्रदर्शनमा आएको ११ दिन पूरा भइसकेको छ । प्रदर्शनसँगै फिल्मको कमाइमा निरन्तर वृद्धि देखिएको छ भने सामाजिक सञ्जालमा कलाकारहरूको अभिनयको व्यापक प्रशंसा भइरहेको छ ।

सप्ताहान्तमा उल्लेखनीय कमाइ गरेसँगै ‘धुरन्धर’ यस वर्षको तेस्रो सर्वाधिक कमाइ गर्ने फिल्म बन्न सफल भएको छ । यद्यपि, उत्कृष्ट व्यापार गरे पनि फिल्म हालसम्म दुई ठूला चलचित्रभन्दा पछाडि नै छ । आगामी सप्ताहान्तमा कमाइ अझै बढ्ने अनुमान गरिएको छ, जसले ती चलचित्रलाई उछिन्न सक्ने अपेक्षा गरिएको छ ।

साक्निल्कको रिपोर्टअनुसार ‘धुरन्धर’ ले ११औँ दिन मात्रै २९ करोड भारु कमाइ गरेको छ । हालसम्म भारतमा फिल्मले कुल ३७९.७५ करोड भारु संकलन गरिसकेको छ । विश्वव्यापी कलेक्सनतर्फ हेर्दा चलचित्रले ५७९.२५ करोड भारु कमाइ गरेको छ ।

यससँगै ‘धुरन्धर’ चालु वर्षको तेस्रो सबैभन्दा बढी कमाइ गर्ने फिल्म बनेको छ । अहिले फिल्म ‘छावा’ र ‘कान्तारा: च्याप्टर १’ भन्दा पछाडि रहेको छ । छावाले विश्वभर ८०७.९१ करोड भारु र कान्तारा: च्याप्टर १ ले ८५२.२५ करोड भारु कमाइ गरिसकेका छन् । आगामी दिनमा ‘धुरन्धर’ ले यी दुवै फिल्मलाई पछि पार्न सक्ने अनुमान गरिएको छ ।

फिल्मको कलाकारमा रणवीर सिंह र अक्षय खन्नासँगै सञ्जय दत्त, अर्जुन रामपाल, राकेश बेदी तथा सारा अर्जुन प्रमुख भूमिकामा रहेका छन् ।