चालु आर्थिक वर्षको पहिलो पाँच महिनामा वाणिज्य बैंकहरूको नाफा उल्लेख्य रूपमा घटेको छ । नेपाल राष्ट्र बैंकका अनुसार चालु आवको पाँच महिनासम्म वाणिज्य बैंकहरूले २५ अर्ब ७२ करोड ७ लाख रुपैयाँ नाफा कमाएका छन्, जुन गत आवको सोही अवधिको तुलनामा १४.९५ प्रतिशतले कम हो ।

गत आर्थिक वर्षको यही अवधिमा वाणिज्य बैंकहरूले ३० अर्ब २४ करोड ८ लाख रुपैयाँ नाफा कमाएका थिए । तर चालु आवमा आइपुग्दा २० वटा वाणिज्य बैंकमध्ये केवल ६ बैंकको नाफा मात्र वृद्धि भएको छ भने बाँकी १४ बैंकको नाफा घट्न पुगेको छ ।

विशेषतः जेनजी आन्दोलनपश्चात् बजारमा देखिएको सुस्तता र अधिक तरलताको अवस्थाले बैंकहरूको नाफामा संकुचन ल्याएको विश्लेषण गरिएको छ । घट्दो ब्याजदर, उद्योग–व्यवसाय, रियल स्टेट तथा सेयर कारोबारमा आएको मन्दीका कारण कर्जाको माग उल्लेख्य रूपमा बढ्न नसक्दा बैंकहरूको आम्दानीमा प्रत्यक्ष असर परेको देखिन्छ ।

बजारमा अधिक तरलता रहे पनि कर्जा विस्तार हुन नसक्दा ब्याजदरमा गिरावट आएको छ । यससँगै कर्जा असुलीमा समेत समस्या देखिन थालेपछि खराब कर्जा बढ्दै गएको छ, जसले बैंकहरूको नाफामा थप दबाब सिर्जना गरेको राष्ट्र बैंकको तथ्यांकले देखाउँछ ।

नाफा सबैभन्दा धेरै घट्ने बैंकमा सिटिजन्स बैंक अग्रस्थानमा रहेको छ । बैंकको नाफा गत वर्षको तुलनामा ६४.९२ प्रतिशतले घटेको छ । समग्रमा, आर्थिक गतिविधिमा आएको सुस्तता, घट्दो ब्याजदर र कर्जाको माग कमजोर बन्दै जाँदा वाणिज्य बैंकहरूको नाफा चालु आवमा चुनौतीपूर्ण बन्दै गएको देखिन्छ ।