राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले सरकारको नेतृत्व गरिरहेको दल रास्वपालाई परिपक्व र जिम्मेवार व्यवहार प्रदर्शन गर्न सुझाव दिएका छन्।

आज रास्वपा सभापति रवि लामिछाने ले आह्वान गरेको सर्वदलीय बैठकमा बोल्दै लिङ्देनले देशका संवेदनशील विषयमा सरकार र सत्तारूढ दलले सावधानीपूर्वक अभिव्यक्ति दिनुपर्ने बताएका हुन्।

बैठकपछि सञ्चारकर्मीहरूसँग कुरा गर्दै उनले भने, “देश जित्नेको मात्र होइन, हार्नेको पनि हो। सरकारले गर्ने गलत क्रियाकलापको असर सम्पूर्ण देशले व्यहोर्नुपर्ने हुन्छ। त्यसैले परिपक्व व्यवहार आवश्यक छ।”

लिङ्देनले प्रधानमन्त्री बालेन शाह ले संसद्मा सीमा सम्बन्धी विषयमा दिएको मन्तव्य तथा रास्वपा सभापति लामिछानेले भारत भ्रमणका क्रममा व्यक्त गरेको “हामीले विगतको भारी बोक्दैनौं” भन्ने अभिव्यक्ति अपरिपक्व रहेको टिप्पणी गरे।

उनले राष्ट्रिय हित, छिमेकी सम्बन्ध तथा संवेदनशील कूटनीतिक विषयमा बोल्दा राजनीतिक नेतृत्वले संयमित र जिम्मेवार दृष्टिकोण अपनाउनुपर्नेमा जोड दिए।

सर्वदलीय बैठकमा समसामयिक राजनीतिक अवस्था, सरकारका गतिविधि तथा राष्ट्रिय सरोकारका विषयमा छलफल भएको बताइएको छ।