प्राविधिक शिक्षा तथा व्यावसायिक तालिम परिषद् (सीटीईभीटी)को उपाध्यक्ष नियुक्तिका लागि आठ जना संक्षिप्त सूचीमा परेका छन्।

उपाध्यक्ष छनोट समितिले आइतबार सार्वजनिक गरेको सूचीअनुसार उपेन्द्र पोखरेल, उमेशकुमार मिश्र, काजीराम अधिकारी, कुष्माकर भट्ट, खेमराज जोशी, टैलेन्द्र आचार्य, मोहम्मद सफिउल्लाह र हरिशंकरप्रसाद साह संक्षिप्त सूचीमा परेका हुन्।

समितिका अनुसार आगामी पुस २८ गते उनीहरूको प्रस्तुतीकरण तथा अन्तर्वार्ता लिइनेछ। उक्त प्रक्रियापछि समितिले तीन जनाको नाम सिफारिस गर्नेछ। सिफारिस गरिएका नामहरूमध्येबाट मन्त्रिपरिषद् बैठकले एक जनालाई सीटीईभीटीको उपाध्यक्षमा नियुक्त गर्ने व्यवस्था छ।

सीटीईभीटीमा २०८१ माघदेखि उपाध्यक्ष पद रिक्त रहँदै आएको छ। परिषद्‌को नेतृत्व रिक्त रहँदा प्राविधिक तथा व्यावसायिक शिक्षासम्बन्धी कार्यक्रमहरू प्रभावित हुँदै आएका छन्।