भारतीय अर्थशास्त्री डा. विवेक देबरायको निधन भएको छ। ६९ वर्षको उमेरमा शुक्रबार बिहान दिल्लीस्थित एम्स अस्पतालमा निधन भएको हो। उनी आन्द्राको संक्रमणबाट पीडित थिए।

पद्मश्री पुरस्कार विजेता देबराय हाल प्रधानमन्त्री नरेन्द्र मोदीको आर्थिक सल्लाहकार परिषद्का अध्यक्षका थिए। उनको प्रारम्भिक शिक्षा कोलकाताको नरेन्द्रपुरको रामकृष्ण मिशन स्कूलमा भएको थियो। यसपछि उनले कोलकाताको प्रेसिडेन्सी कलेज, दिल्ली स्कूल अफ इकोनोमिक्स र क्याम्ब्रिजको ट्रिनिटी कलेजबाट उच्च शिक्षा पूरा गरेका थिए।

पूर्वीय साहित्यलाई अंग्रजीमा अनुवाद गर्ने काममा पनि उनले महत्त्वपूर्ण योगदान गरेका थिए। महाभारत, रामायण तथा चारवटै वेदलगायत विभिन्न संस्कृत कृतिहरूलाई उनले अंग्रेजीमा अनुवाद गरेका थिए। मोदीले उनलाई ‘टावरिङ स्कलर’ भन्दै अर्थशास्त्र, इतिहास, संस्कृति, राजनीतिक, अध्यात्मलगायत क्षेत्रमा उनी पारङ्‍गत रहेको बताएका छन्।