ऊर्जा, जलस्रोत तथा सिंचाई मन्त्री कुलमान घिसिङले पदबाट राजीनामा दिनेबारे सञ्चारमाध्यममा आएका समाचारलाई भ्रान्तिपूर्ण बताउँदै त्यसको खण्डन गरेका छन्।

सामाजिक सञ्जालमार्फत वक्तव्य जारी गर्दै मन्त्री घिसिङले “राजीनामा दिने तयारी” विषयक समाचारप्रति गम्भीर ध्यानाकर्षण भएको उल्लेख गर्दै भनेका छन्, “पदबाट राजीनामा दिन लागेको भन्ने समाचारमा कुनै सत्यता छैन। म तीनवटा मन्त्रालयको जिम्मेवारी सम्हाल्दै आन्दोलनले दिएको जनादेश र विश्वास पूरा गर्न निरन्तर क्रियाशील छु।” केही सञ्चारमाध्यमहरूले घिसिङले राजीनामा दिएर नयाँ दल गठन गर्ने तयारी गरेको समाचार प्रकाशित गरेका थिए।

तर, मन्त्री घिसिङले उक्त समाचारलाई पूर्णरूपमा असत्य भन्दै भनेका छन्, “जेन–जी पुस्ताको ऐतिहासिक आन्दोलनपछि बनेको यो सरकार जनताको आशा र विश्वास पूरा गर्न प्रतिबद्ध छ। म सरकारमा रहँदै त्यस लक्ष्यप्रति समर्पित छु।”