राष्ट्रियसभा सदस्य विष्णुबहादुर विश्वकर्माले मन्त्रीहरूका लागि महँगा सरकारी गाडी खरिद गर्नुको सट्टा साइकलको व्यवस्था गर्न सरकारलाई सुझाव दिएका छन्।

बिहीबार राष्ट्रियसभा बैठकको शून्य समयमा बोल्दै उनले सरकारले अर्बौं रुपैयाँ खर्चेर नयाँ गाडी खरिद गर्ने तयारी गरिरहेको भन्ने समाचारप्रति आपत्ति जनाउँदै राज्यको खर्च प्राथमिकतामुखी हुनुपर्ने धारणा राखे।

उनले यसअघि अर्बौं रुपैयाँ बराबरका सरकारी गाडी नष्ट गरिएको उल्लेख गर्दै फेरि ठूलो रकम खर्चेर नयाँ सवारीसाधन खरिद गर्न लागिएको भन्दै प्रश्न उठाए।

विश्वकर्माले नागरिकले आधारभूत स्वास्थ्य सेवा र औषधिसमेत सहज रूपमा पाउन नसकेको अवस्थामा सरकारले मन्त्रीहरूको सुविधाका लागि गाडी खरिद गर्न खोज्नु उचित नहुने बताए। उनले राज्यको स्रोतसाधन जनताको आधारभूत आवश्यकतामा केन्द्रित हुनुपर्ने धारणा व्यक्त गरे।

सरकारले मितव्ययिताको उदाहरण प्रस्तुत गर्न मन्त्री तथा जनप्रतिनिधिले साइकल प्रयोग गर्न सक्ने सुझाव दिँदै उनले सिंहदरबार पुनर्निर्माण आवश्यक परे जनसहभागिता र चन्दाबाट समेत गर्न सकिने टिप्पणी गरे।

विश्वकर्माले सरकारलाई जनताको दैनिक समस्या समाधानमा प्राथमिकता दिन आग्रह गर्दै विलासी खर्च नियन्त्रण गर्नुपर्ने आवश्यकता औँल्याए।