मुग्लिन–पोखरा खण्डअन्तर्गत पृथ्वी राजमार्गकै सबैभन्दा लामो आर्क डिजाइनको मादी पुल निर्माण तीव्र गतिमा भइरहेको छ। पुल निर्माणका लागि दैनिक एक सय ३० कामदार परिचालन गरिएको छ। व्यास नगरपालिका–४ र ५ जोड्ने मादी नदीमा निर्माणाधीन चार लेनको पुल पर्यटकलाई आकर्षित गर्ने उद्देश्यले कलात्मक आर्क डिजाइनमा निर्माण भइरहेको आयोजनाका इञ्जिनियर विष्णुप्रसाद पाण्डेले जानकारी दिए। उनका अनुसार पुल केवल यातायातका लागि मात्र नभई पर्यटकलाई पनि आकर्षित गर्ने उद्देश्यले बनाइँदैछ।

तीन सय १५ मिटर लामो पुलको हालसम्म ७४ प्रतिशत भौतिक प्रगति भइसकेको आयोजनाले जनाएको छ। सम्झौताअनुसार समयमै काम नसकिएपछि ११ महिना म्याद थप गरिएको छ। पुलको ढलान गर्नुअघि फर्मा लगाउने, डण्डी तान्ने र टेका लगाउने जस्ता कामहरू भइरहेको इञ्जिनियर पाण्डेले बताए। चार लेनको एउटै बेस भएको मादी पुल पृथ्वी राजमार्गकै पहिलो र सबैभन्दा लामो पुल हुने बताइएको छ। पुलमा छ वटा स्पान निर्माण हुनेछन्।

निर्माण कम्पनीले विसं २०७९ साउन २६ गते रु एक अर्ब २१ करोडमा तीन वर्षभित्र पुल सम्पन्न गर्ने गरी ठेक्का सम्झौता गरेको थियो। हाल नदीमाथि रहेको दुई लेनको पुल ३७० मिटर लम्बाइको छ र नयाँ पुल त्यसबाट करिब ५० मिटर दूरीमा निर्माण भइरहेको छ। मुग्लिन–पोखरा सडक आयोजनाको पूर्वी खण्डअन्तर्गत आँबुखैरेनीदेखि जामुनेसम्म १३ वटा पुल निर्माण भइसकेका छन् भने ४१.४५ किलोमिटर कालोपत्र सकिएको छ। पूर्वी खण्डमा विसं २०७७ माघ १७ गते सम्झौता भई विसं २०७८ वैशाख २ गतेदेखि काम सुरु भएको थियो।