चालु आर्थिक वर्ष २०८२/८३ को पहिलो चार महिनामा नेपालीहरू विदेश जाँदा देशबाट ७५ अर्ब ७४ करोड रुपैयाँ बाहिरिएको छ। नेपाल राष्ट्र बैंकले सार्वजनिक गरेको विवरणअनुसार २०८२ साउनदेखि कात्तिक मसान्तसम्मको अवधिमा सो ठूलो रकम विदेशिएको हो।

राष्ट्र बैंकका अनुसार अघिल्लो आर्थिक वर्ष २०८१/८२ को सोही अवधिको तुलनामा चालु आर्थिक वर्षमा विदेशिने रकम ११.८ प्रतिशतले वृद्धि भएको छ। गत आर्थिक वर्षको पहिलो चार महिनामा नेपालीहरू विदेश जाँदा ६७ अर्ब ७५ करोड रुपैयाँ देशबाट बाहिरिएको थियो।

चालु आर्थिक वर्षको पहिलो चार महिनामा विदेश अध्ययनका लागि जाने विद्यार्थीहरूले मात्र ४८ अर्ब २६ करोड रुपैयाँ विदेश लगेका छन्। अघिल्लो आर्थिक वर्षमा यस्तो खर्च ३७ अर्ब ७७ करोड रुपैयाँ रहेको थियो, जसले अध्ययनका लागि हुने विदेश यात्रामा उल्लेख्य वृद्धि भएको देखाउँछ।

यसैबीच, नेपाल भ्रमणमा आउने पर्यटकबाट हुने आयमा भने सामान्य सुधार देखिएको छ। राष्ट्र बैंकको तथ्यांकअनुसार चालु आर्थिक वर्षको पहिलो चार महिनामा पर्यटक खर्च ०.९ प्रतिशतले वृद्धि भई २७ अर्ब १५ करोड रुपैयाँ पुगेको छ। अघिल्लो वर्षको सोही अवधिमा यस्तो आय २६ अर्ब ९० करोड रुपैयाँ थियो।

विदेश जाने नेपालीहरूको संख्या र त्यससँगै बाहिरिने रकम निरन्तर बढ्दै जाँदा देशको अर्थतन्त्रमा दीर्घकालीन असर पर्ने चिन्ता बढ्दै गएको छ।