ताजा
लोकप्रिय
ऊर्जा, भौतिक पूर्वाधार तथा सहरी विकासमन्त्री कुलमान घिसिङले तोकिएको समयमा काम सम्पन्न नगर्ने ठेकेदारहरूका २५० भन्दा बढी सडक ठेक्का तोड्ने प्रक्रिया अघि बढाइएको बताएका छन्। बुधबार सिंहदरबारमा बाजुराको मार्तडी सडकखण्ड सञ्चालन गर्नुपर्ने मागसहित युवाहरूले बुझाएको ज्ञापनपत्र ग्रहण गर्दै मन्त्री घिसिङले दीर्घकालीन ढिलाइ र गैरजिम्मेवार प्रवृत्ति अब सह्य नहुने स्पष्ट गरे।
मन्त्री घिसिङका अनुसार, लामो समयसम्म ठेक्का होल्ड हुँदा जनतालाई सास्ती र राष्ट्रलाई हानि पुग्ने भएकाले सडक, भौतिक, सहरी विकास तथा ऊर्जा–सिंचाई क्षेत्रका ठूला परियोजनाहरूमा पनि समयमै प्रगति नभए ठेक्का तोडिनेछ। राज्यले बजेट छुट्याएर अघि बढाएका योजनामा निर्माण व्यवसायीले काम सुरु नै नगर्नु “राष्ट्रकै लागि घातक” भएको उनले टिप्पणी गरे।
उनले ठेकेदारहरूले तोकिएको समयमा काम सम्पन्न गर्नुपर्नेमा जोड दिंदै अब ढिलाइ र लापर्वाही नछुट्ने बताएका हुन्। बाजुराको मार्तडी सडकखण्ड सुचारु गर्न मन्त्रालयले विशेष ध्यान दिने प्रतिबद्धता मन्त्री घिसिङले व्यक्त गरेका छन्। प्रदेश सरकारले पूरा गर्न नसकेको खण्डमा संघ सरकारले आवश्यक सहयोग गर्न तयार रहेको उनले स्पष्ट पारे।
