नेपाली कांग्रेसले फागुन २१ गते हुने प्रतिनिधि सभा निर्वाचनमा भाग लिने औपचारिक निर्णय गरेको छ। शनिबार पार्टी केन्द्रीय कार्यालय, सानेपामा बसेको कांग्रेस केन्द्रीय कार्यसमितिको बैठकले प्रतिनिधि सभा निर्वाचनको मिति घोषणा भइसकेको अवस्थामा निर्वाचनमार्फत वर्तमान राजनीतिको उचित निकास सुनिश्चित गर्न सकिन्छ भन्ने निष्कर्ष निकाल्दै यस्तो निर्णय गरेको हो।
पार्टी प्रवक्ता डा. प्रकाशशरण महतका अनुसार, निर्वाचनमार्फत संविधानको रक्षा र जन–जनको आवाजलाई संस्थागत रूप दिन सकिने कांग्रेसको दृढ विश्वास रहेको छ।
बैठकले राष्ट्रिय सभा सदस्य निर्वाचन र प्रतिनिधि सभा सदस्य निर्वाचनको प्रयोजनका लागि दल दर्ता निर्वाचन आयोगमा गर्ने निर्णय पनि गरेको छ। पार्टीले भने भयरहित वातावरणको आवश्यकता औँल्याउँदै, हजारौँ कैदीबन्दी फरार हुनु, ठूलो परिमाणमा हातहतियार हराउनु, तथा राजनीतिक दलहरूले निर्वाध रूपमा कार्यक्रम सञ्चालन गर्न नसक्नु जस्ता अवस्था गम्भीर भएको निष्कर्ष निकालेको छ।
त्यस्तै, बैठकले निर्वाचनलाई निष्पक्ष, विश्वसनीय र भयरहित बनाउन निर्वाचन आयोग, सरकार र सम्बन्धित पक्षलाई आवश्यक वातावरण निर्माण गर्न माग गरेको प्रवक्ता महतले बताए। साथै, शान्ति–सुरक्षा सुधार, सुरक्षाकर्मीको मनोबल उच्च राख्ने र आम नागरिकमा भयमुक्त वातावरण सुनिश्चित गर्न समेत अनुरोध गरिएको छ।
बैठकले कुनै पनि हिंसा वा उत्तेजनाको बाटो नअपनाउन, निषेधको राजनीति नगर्न, संयमता अपनाएर संवादमार्फत समाधान खोज्न आह्वान गरेको छ। प्रवक्ता महतले पार्टीको महाधिवेशन सम्बन्धी निर्णयहरू सर्वसम्मत रूपमा एकताबद्ध भएर गरिने जानकारी पनि दिएका छन्।
यो खबर पढेर तपाईलाई कस्तो महसुस भयो ?
प्रतिक्रिया
सम्बन्धित खवर
