चालु आर्थिक वर्ष २०८२/८३ को पहिलो पाँच महिनामा सरकारले कुल ४ खर्ब ९ अर्ब ७८ करोड रुपैयाँ राजश्व संकलन गरेको छ। अर्थ मन्त्रालयका अनुसार मंसिर मसान्तसम्म कर राजश्व ३ खर्ब ८२ अर्ब २३ करोड, गैरकर राजश्व २४ अर्ब ७ करोड र विविध प्राप्ति ३ अर्ब ४७ करोड रहेको छ। यो संकलन वार्षिक लक्ष्यको ७८.७४ प्रतिशत हो।

गत आर्थिक वर्षको सोही अवधिको तुलना गर्दा यस वर्ष राजश्व संकलनमा १.६८ प्रतिशत वृद्धि देखिएको छ। आर्थिक चुनौतीका बीच पनि राजश्व वृद्धिदर सकारात्मक हुनु उत्साहजनक भएको अर्थ मन्त्रालयले जनाएको छ। तर आयकरतर्फ भने संकलन ८ प्रतिशतले घटेको मन्त्रालयको विवरणमा उल्लेख छ।

मन्त्रालयका अनुसार हाल घरजग्गा कित्ताकाट खुलेको, सेयर बजारमा सुधारका संकेत देखिन थालेका र आसन्न निर्वाचन तथा पुनर्निर्माण गतिविधि तीव्र हुँदै गएकाले आगामी महिना राजश्व संकलन थप सुधार हुने अपेक्षा गरिएको छ। यी गतिविधिले आर्थिक चलायमानता बढाउँदै राजश्व लक्ष्य पूरा गर्न सहयोग पुर्‍याउने मन्त्रालयको अनुमान छ।