नेपाल स्टक एक्सचेन्ज (नेप्से) का प्रमुख कार्यकारी अधिकृत (सीईओ) चुडामणि चापागाईंले पदबाट राजीनामा दिएका छन्। उनले सोमबार अर्थ मन्त्रालय पुगेर अर्थमन्त्री डा. स्वर्णिम वाग्लेसमक्ष राजीनामा पत्र बुझाएका हुन्। चापागाईं २०८१ चैत १९ गते नेप्सेको सीईओमा नियुक्त भएका थिए।

सरकारले हालै अध्यादेशमार्फत विभिन्न नियामक निकायका पदाधिकारीलाई पदमुक्त गरेपछि संस्थान तथा सार्वजनिक निकायका प्रमुखहरूमाथि पनि पद छाड्ने दबाब बढेको सन्दर्भमा चापागाईंको राजीनामा आएको बताइएको छ।

नेप्से स्रोतका अनुसार पछिल्ला समय चापागाईंका केही निर्णय विवादमा परेका थिए। उनले चिया विकास निगमसँग बुक बिल्डिङ विधिमार्फत प्राथमिक शेयर (आईपीओ) निष्कासनका लागि सम्झौता गरेका थिए, जसबारे सञ्चालक समितिले उनीसँग स्पष्टीकरण मागेको थियो।

अर्थ मन्त्रालय स्रोतका अनुसार स्पष्टीकरण पेश गरेसँगै चापागाईंले राजीनामा पनि बुझाएका हुन्। यद्यपि, उनको राजीनामाबारे मन्त्रालयले औपचारिक निर्णय सार्वजनिक गरिसकेको छैन।