ताजा
लोकप्रिय
चीन भ्रमणमा रहेका परराष्ट्रमन्त्री शिशिर खनाल र चिनियाँ विदेशमन्त्री वाङ यीबीच बेइजिङमा द्विपक्षीय भेटवार्ता भएको छ। वाङ यी चिनियाँ कम्युनिस्ट पार्टीको केन्द्रीय समितिको राजनीतिक ब्युरोका सदस्यसमेत हुन्।
भेटपछि प्रतिक्रिया दिँदै मन्त्री खनालले वाङ यीसँगको भेटप्रति खुसी व्यक्त गर्दै दुई देशबीचका विभिन्न विषयमा व्यापक छलफल भएको जानकारी दिएका छन्।
उनका अनुसार भेटवार्तामा कनेक्टिभिटी, सीमा व्यवस्थापन, व्यापार, प्रविधि हस्तान्तरण तथा बहुपक्षीय सहकार्यका क्षेत्रहरूमा विस्तृत विचार-विमर्श भएको थियो।
“हामीले जनता–जनताबीचको सम्बन्ध विस्तार गर्ने विषयमा पनि विचार आदानप्रदान गर्यौं र नेपाल–चीन सम्बन्धलाई अझ सुदृढ बनाउने साझा प्रतिबद्धता दोहोर्याएका छौं,” मन्त्री खनालले बताएका छन्।
बेइजिङस्थित नेपाली दूतावासले जारी गरेको विज्ञप्तिअनुसार नेपाली पक्षले एक चीन सिद्धान्तप्रति आफ्नो दृढ प्रतिबद्धता दोहोर्याउँदै नेपाली भूमिलाई चीनविरोधी गतिविधिका लागि प्रयोग हुन नदिने स्पष्ट गरेको छ।
त्यसको जवाफमा चिनियाँ पक्षले नेपाल सरकारको सुशासन र आर्थिक विकासका प्राथमिकताप्रति पूर्ण समर्थन व्यक्त गर्दै नेपालको सार्वभौमसत्ता, क्षेत्रीय अखण्डता र स्वतन्त्रताप्रति आफ्नो प्रतिबद्धता पुनः दोहोर्याएको दूतावासले जनाएको छ।
भेटमा पूर्वाधार विकास, कनेक्टिभिटी, सीमा व्यवस्थापन, ऊर्जा, व्यापार, लगानी, कृषि, प्रविधि हस्तान्तरण, सूचना प्रविधि तथा डिजिटलाइजेसन, पर्यटन, रासायनिक मल, पेट्रोलियम तथा प्राकृतिक ग्यास अन्वेषण र जनता–जनताबीचको सम्बन्ध लगायतका विषयमा पनि छलफल भएको थियो।
दुवै पक्षले यसअघि भएका सहमति र परियोजनाहरूलाई द्रुत रूपमा कार्यान्वयन गर्ने प्रतिबद्धता व्यक्त गरेका छन्। साथै, क्षेत्रीय तथा बहुपक्षीय मञ्चहरूमा साझा हितका विषयमा सहकार्यलाई थप सुदृढ बनाउने विषयमा पनि जोड दिइएको दूतावासले जनाएको छ।
द्विपक्षीय बैठकपछि परराष्ट्रमन्त्री खनाल चिनियाँ विदेशमन्त्री वाङ यीले आयोजना गरेको रात्रिभोजमा सहभागी भएका थिए।
