ताजा
लोकप्रिय
माछापुच्छ्रे बैंक लिमिटेडले चीनको प्रमुख डिजिटल भुक्तानी सेवा प्रदायक टेनपे पेमेन्ट टेक्नोलोजी कम्पनी लिमिटेडसँग प्रत्यक्ष साझेदारी गर्दै नेपालमा वीच्याट पे (Weixin Pay) मार्फत अन्तर्राष्ट्रिय डिजिटल भुक्तानी सेवा शुरू गर्ने भएको छ।
यस साझेदारीपछि चीनबाट नेपाल आउने पर्यटकहरूले चिनियाँ मुद्रा (CNY) प्रयोग गरी सिधै नेपालमा डिजिटल भुक्तानी गर्न सक्नेछन् भने नेपाली व्यापारीहरूले उक्त भुक्तानीको रकम नेपाली रुपैयाँ (NPR) मा प्राप्त गर्नेछन्। बैंकका अनुसार यसले भुक्तानी प्रक्रियालाई सरल, छरितो र सुरक्षित बनाउँदै पर्यटन, होटल , खुद्रा व्यापार तथा सेवा क्षेत्रमा डिजिटल कारोबारलाई उल्लेख्य रूपमा प्रवर्द्धन गर्नेछ।
माछापुच्छ्रे बैंकले यो सेवा सुरू भएसँगै विदेशी पर्यटकका लागि नगद बोक्नुपर्ने झन्झट कम हुने र नेपाली व्यवसायीहरूलाई अन्तर्राष्ट्रिय ग्राहकबाट भुक्तानी लिन सहज हुने बताएको छ। साथै, भुक्तानीको सेटलमेन्ट स्वदेशमै नेपाली रुपैयाँमा हुने भएकाले विनिमय जोखिम र ढिलाइसमेत कम हुने बैंकको विश्वास छ।
बैंकले उक्त साझेदारी डिजिटल नेपाल फ्रेमवर्क, नगदरहित अर्थतन्त्रको प्रवर्द्धन, भुक्तानी पूर्वाधारको आधुनिकीकरण तथा वित्तीय डिजिटल समावेशीकरणका लक्ष्यहरूसँग मेल खाने महत्वपूर्ण उपलब्धि भएको उल्लेख गरेको छ।
