सिन्धुलीको घ्याङ्लेख गाउँपालिका–२ मा रहेको नेपाल एसबीआई बैंकको शाखामा सोमबार साँझ लुटपाट भएको छ । जिल्ला प्रहरी कार्यालय, सिन्धुलीका अनुसार साँझ करिब ७ बजे बैंकमा लुटपाट भएको हो ।

घटनापछि प्रहरीले खोजतलास र अनुसन्धान प्रक्रिया तीव्र पारेको जनाएको छ । स्थानीयका अनुसार नकाबधारी समूह बैंकभित्र प्रवेश गरी सुरक्षामा खटिएका गार्डलाई कुटपिट गर्दै कर्मचारीलाई नियन्त्रणमा लिएको र त्यहाँ रहेको रकम लुटेर फरार भएको हो ।

लुटपाटमा घाइते भएका सेक्युरिटी गार्डको घ्याङ्लेख गाउँपालिकाकै बस्तीपुर स्वास्थ्य चौकीमा उपचार भइरहेको प्रहरीले जनाएको छ । लुटिएको रकमको यकिन विवरण भने अहिलेसम्म सार्वजनिक गरिएको छैन । घटनामा संलग्नको खोजीका लागि जिल्ला प्रहरी कार्यालयको नेतृत्वमा विशेष टोली परिचालन गरिएको छ ।