नेपाल दूरसञ्चार प्राधिकरणले अनलाइन सट्टेबाजी (बेटिङ) तथा अवैधानिक वित्तीय कारोबारमा प्रयोग भइरहेका २ लाख २३ हजार ५६८ वटा वेबसाइट तथा एप बन्द गरेको छ।

सरकारले गत चैत १३ गते जारी गरेको ‘शासकीय सुधारसम्बन्धी एक सय कार्यसूची’को ४२औँ बुँदामा अनलाइन सट्टेबाजी र ठगी (स्क्यामिङ) नियन्त्रणको विषय समेटेको थियो। उक्त कार्यसूचीमा सञ्चार तथा सूचना प्रविधि मन्त्रालयले सट्टेबाजीसम्बन्धी एप तथा वेबसाइट २४ घण्टाभित्र बन्द गर्ने उल्लेख गरिएको थियो।

सोही नीतिगत निर्णय कार्यान्वयन गर्दै प्राधिकरणले अवैध सट्टेबाजी तथा वित्तीय कारोबारमा प्रयोग भइरहेका वेबसाइट र एपलाई क्रमशः बन्द गर्दै आएको जनाएको छ। विशेषगरी विश्वकप फुटबलका बेला अनलाइन बेटिङको प्रयोग बढ्न सक्ने भन्दै प्रधानमन्त्री तथा मन्त्रिपरिषद्को कार्यालयले समेत चासो देखाएपछि प्राधिकरणले निगरानी र कारबाहीलाई तीव्रता दिएको हो।

यसका लागि प्राधिकरणले छुट्टै कार्यदलसमेत गठन गरेको छ। कार्यदलले इन्टरनेट सेवा प्रदायक (आईएसपी)का प्रतिनिधिसँगको सहकार्यमा अवैध वेबसाइट तथा एपका यूआरएल पहिचान गरी बन्द गर्ने काम गरिरहेको जनाएको छ।

प्राधिकरणका अनुसार एउटा वेबसाइट वा एप बन्द गरिएपछि त्यसैको नाम वा स्वरूप परिवर्तन गरी नयाँ वेबसाइट तथा एप सञ्चालनमा आउनु भने मुख्य चुनौती बनेको छ। यस्तो गतिविधि नियन्त्रणका लागि प्राधिकरणले ‘थ्रेट इन्टेलिजेन्स टुल’मार्फत निरन्तर निगरानी तथा खोजी गरिरहेको जनाएको छ।

प्राधिकरणले अवैध वेबसाइट तथा एपबारे जानकारी भएमा सम्बन्धित माध्यमबाट जानकारी गराउन सर्वसाधारणलाई आग्रहसमेत गरेको छ।

अनलाइन सट्टेबाजी र अवैध वित्तीय कारोबार नियन्त्रणका लागि प्राधिकरणले थालेको यो अभियानले डिजिटल माध्यमबाट हुने ठगी तथा गैरकानुनी कारोबार रोकथाममा सहयोग पुग्ने अपेक्षा गरिएको छ।