मंगलवार , आश्विन २७, २०८३
माउन्टेन इनर्जी नेपाल लिमिटेडले गत आर्थिक वर्ष २०८२/८३ को मुनाफाबाट सेयरधनीलाई २१.०५३ प्रतिशत लाभांश वितरण गर्ने प्रस्ताव गरेको छ। कम्पनीले हाल कायम चुक्ता पुँजीको २० प्रतिशत बोनस सेयर र बोनस सेयरमा लाग्ने कर प्रयोजनका लागि १.०५३ प्रतिशत नगद लाभांश वितरण गर्न लागेको हो।
कम्पनीको असोज २६ गते बसेको सञ्चालक समितिको बैठकले उक्त लाभांश प्रस्ताव पारित गर्न आगामी कात्तिक २० गते १३औँ वार्षिक साधारणसभा बोलाउने निर्णय गरेको छ। प्रस्तावित लाभांश साधारणसभाबाट स्वीकृत भएपछि वितरण प्रक्रिया अघि बढ्नेछ।
.gif)
कम्पनीको वार्षिक साधारणसभामा लाभांश प्रस्तावसँगै प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने प्रस्ताव पनि पेस गरिनेछ। त्यसैगरी, पाँच जना सञ्चालकको निर्वाचन गर्ने र लेखापरीक्षक नियुक्त गर्ने प्रस्तावमाथि छलफल गरी निर्णय गरिने कम्पनीले जनाएको छ।
कम्पनीले साधारणसभा तथा प्रस्तावित लाभांश वितरण प्रयोजनका लागि कात्तिक १० गते एक दिनका लागि सेयर दाखिल खारेज बन्द (बुक क्लोज) गर्ने भएको छ। त्यसअनुसार कात्तिक ९ गतेसम्म नेपाल स्टक एक्सचेन्ज (नेप्से) मा कारोबार भई नियमानुसार कायम रहेका सेयरधनीले साधारणसभामा सहभागी हुन तथा प्रस्तावित लाभांश प्राप्त गर्न सक्नेछन्।
प्रस्तावित लाभांशबाट सेयरधनीले नगदभन्दा बोनस सेयरका रूपमा बढी प्रतिफल पाउनेछन्। यद्यपि, बोनस सेयर वितरणपछि कम्पनीको चुक्ता पुँजी बढ्ने भएकाले सेयरधनीको वास्तविक प्रतिफल मूल्याङ्कन गर्दा कम्पनीको वित्तीय अवस्था, सेयरको बजार मूल्य र भविष्यको आम्दानी क्षमतालाई समेत ध्यान दिनुपर्ने हुन्छ।
Be the first to comment!
© 2026 All right reserved to businessnewsnepal.com
Design & Developed By
प्रतिक्रिया दिनुहोस