राहदानी विभागले दैनिक एक हजार थान विद्युतीय राहदानी वितरण गरिने स्पष्ट गरेको छ। विभागले आइतबार साँझ एक विज्ञप्ति जारी गर्दै सार्वजनिक विदा बाहेक हरेक दिन राहदानी उपलब्ध गराइने जनाएको हो।

विभागका अनुसार विद्युतीय राहदानी आपूर्तिका लागि गत साउनमा नयाँ आपूर्तिकर्तासँग खरिद सम्झौता भइसकेको छ। सम्झौताअनुसार आगामी फागुन ११ गतेदेखि नयाँ पूर्वाधार र प्रणालीमार्फत राहदानी सेवा सुरु हुने तयारी भइरहेको बताइएको छ।

हालको आपूर्तिकर्ता र नयाँ आपूर्तिकर्ताबीचको ह्यान्डओभर–टेकओभर प्रक्रियासँगै राहदानी पुस्तिकाको सीमितता र सेवाग्राहीको अत्यधिक मागका कारण हाल केही कठिनाइ उत्पन्न भएको विभागले जनाएको छ।

विभागले राहदानीको अभाव नहोस् भन्नका लागि आवश्यक पहल भइरहेको जानकारी दिँदै, अर्को सूचना नभएसम्म अत्यावश्यक सेवाग्राहीहरूले मात्र राहदानीका लागि आवेदन दिन आग्रह गरेको छ।

त्यस्तै, राहदानीका विषयमा अनधिकृत व्यक्तिको भर नपर्न र त्यस्ता व्यक्तिबाट हुन सक्ने ठगी वा ठगी प्रयत्नबाट सावधान रहन पनि विभागले सर्वसाधारणलाई सचेत गराएको छ।