अमेरिकी राष्ट्रपति डोनाल्ड ट्रम्पको सामाजिक सञ्जाल प्लेटफर्म ‘ट्रुथ सोसल’ सञ्चालन गर्ने ट्रम्प मिडिया एन्ड टेक्नोलोजी ग्रुपले निजी स्वामित्वको फ्युजन ऊर्जा कम्पनी TAE टेक्नोलोजिजसँग ६ अर्ब डलरभन्दा बढी मूल्यको मर्जर (विलय) सम्झौता घोषणा गरेको छ।

बिहीबार सार्वजनिक गरिएको जानकारीअनुसार पूर्ण रूपमा सेयर साटासाटमा आधारित यो सम्झौता सन् २०२६ को मध्यतिर सम्पन्न हुने अपेक्षा गरिएको छ। मर्जरपछि दुवै कम्पनीका सेयरधनीहरूले संयुक्त कम्पनीको करिब ५०–५० प्रतिशत स्वामित्व राख्नेछन्। यससँगै संयुक्त कम्पनी “विश्वका पहिलो सार्वजनिक रूपमा सूचीकृत फ्युजन कम्पनीहरूमध्ये एक” बन्ने दाबी गरिएको छ।

मर्जर घोषणापछि ट्रम्प मिडियाको सेयर मूल्यमा उल्लेखनीय वृद्धि देखिएको छ। जनवरीमा उच्च बिन्दुमा पुगेपछि ७५ प्रतिशतभन्दा बढी घटिसकेको सेयर बजार खुलेपछि ३३ प्रतिशतसम्म उकालो लागेको छ। बजार खुल्नुअघि नै सेयर २८ प्रतिशतले बढेको थियो।

अमेरिकाले एआई (कृत्रिम बुद्धिमत्ता) क्षेत्रमा चीनसँग कडा प्रतिस्पर्धा गरिरहेका बेला अत्यधिक ऊर्जाको माग बढ्दै गएको सन्दर्भमा ट्रम्प मिडियाको यो कदमलाई रणनीतिक मोडका रूपमा हेरिएको छ। हालसम्म फ्युजन प्रविधिमार्फत व्यावसायिक रूपमा बिजुली उत्पादन गर्ने कुनै पनि प्लान्ट सञ्चालनमा आएको छैन। तर फ्युजनलाई परमाणु ऊर्जासँग जोडिएका जोखिम बिना स्वच्छ, सुरक्षित र प्रशस्त ऊर्जा उत्पादन गर्न सक्ने भविष्यपरक प्रविधिका रूपमा लिइन्छ।

सम्झौताअनुसार ट्रम्प मिडियाले हस्ताक्षरको समयमा TAE लाई २० करोड डलरसम्म नगद उपलब्ध गराउनेछ। साथै, नियामक कागजात Form S-4 दर्ता भएपछि थप १० करोड डलर उपलब्ध गराइने सहमति भएको छ। मर्जरपछि ट्रम्प मिडियाका अध्यक्ष डेभिन नुनेस र TAE का प्रमुख कार्यकारी अधिकृत डा. मिख्ल बिन्डरबाउर संयुक्त कम्पनीका सह–CEO रहनेछन्।

कम्पनीहरूले बताएअनुसार सम्झौता सम्पन्न भएपछि ट्रम्प मिडिया एन्ड टेक्नोलोजी ग्रुप ट्रुथ सोसल, ट्रुथ+, ट्रुथ.फाइ, TAE, TAE पावर सोलुसन्स र TAE लाइफ साइन्सेसलगायतका व्यवसायहरूको होल्डिङ कम्पनी हुनेछ। यो घोषणाले ट्रम्प मिडियाले यस वर्षको सुरुवातमै वित्तीय सेवामा प्रवेश गरेपछि ऊर्जा, एआई र प्रविधिका क्षेत्रमा थप विविधीकरण गरिरहेको देखाएको छ।

डोनाल्ड ट्रम्पको प्रत्यक्ष वा अप्रत्यक्ष रूपमा ट्रम्प मिडियाका ११ करोड ४० लाखभन्दा बढी सेयरमा स्वामित्व छ। उनले जनवरीमा पुनः पदभार ग्रहण गर्नुअघि आफ्नो बहुमत स्वामित्व फिर्ता लिन सकिने ट्रस्टमा सारेका थिए, जसको एकमात्र ट्रस्टी उनका जेठा छोरा डोनाल्ड ट्रम्प जुनियर हुन्।

TAE सँग मर्जरपछि संयुक्त कम्पनीले आवश्यक स्वीकृति प्राप्त भएपश्चात विश्वकै पहिलो युटिलिटी–स्तरको फ्युजन पावर प्लान्ट निर्माण गर्ने लक्ष्य लिएको छ। कम्पनीका अनुसार यस्ता प्लान्टले आर्थिक, भरपर्दो र प्रशस्त बिजुली उपलब्ध गराउने अपेक्षा गरिएको छ, जसले अमेरिकालाई एआई क्रान्तिमा अग्रता दिलाउन सहयोग गर्नेछ।

TAE टेक्नोलोजिजका अनुसार कम्पनीसँग १,६०० भन्दा बढी पेटेन्ट छन् र गुगल, शेभ्रोन तथा गोल्डम्यान स्याक्सलगायतका लगानीकर्ताबाट १ अर्ब ३० करोड डलरभन्दा बढी पूँजी जुटाइसकेको छ। यद्यपि विज्ञहरूका अनुसार फ्युजन प्रविधि अझै व्यावसायिक स्तरमा पुग्न चुनौतीपूर्ण छ र पहिलो पूर्ण सञ्चालनयोग्य प्लान्ट निर्माण हुन अझै वर्षौँ लाग्न सक्नेछ।