प्रतिनिधिसभाको निर्वाचन नजिकिँदै जाँदा बजारमा अण्डाको माग बढेको छ। माग बढेसँगै अण्डाको मूल्य पनि क्रमशः वृद्धि हुँदै गएको छ। नेपाल लेयर्स कुखुरापालक सङ्घले आजदेखि लागू हुने गरी अण्डाको मूल्य बढाएको हो।

सङ्घका अनुसार ठूलो अण्डाको फार्म मूल्य एक क्रेट (३० वटा)को ४ सय ९५ रुपैयाँ कायम गरिएको छ। यसअघि प्रतिक्रेट ४ सय ६५ रुपैयाँमा बिक्री हुँदै आएको ठूलो अण्डाको मूल्य ३० रुपैयाँले बढाइएको हो। यस्तै, मझौला अण्डाको फार्म मूल्य ४ सय ७५ रुपैयाँ निर्धारण गरिएको छ, जुन यसअघि ४ सय ४५ रुपैयाँ थियो।

यसअघि गत मङ्सिरमा अण्डाको मूल्य हालसम्मकै उच्च बिन्दुमा पुगेको थियो। त्यतिबेला ठूलो अण्डा प्रतिक्रेट ५ सय ६५ रुपैयाँ र मझौला अण्डा ५ सय ५० रुपैयाँमा बिक्री भएको थियो।

सङ्घका अध्यक्ष विनोद पोखरेलका अनुसार निर्वाचनको माहोल सिर्जना हुनु र निर्वाचनसँगै सीमा क्षेत्रमा कडाइ बढ्नु अण्डाको मूल्य वृद्धिका मुख्य कारण हुन्। त्यस्तै, अण्डा उत्पादन गर्ने कुखुराको सङ्ख्या घट्नु, उत्पादनमा कमी आउनु तथा बन्द रहेका विद्यालयहरू खुल्नुजस्ता कारणले पनि माग बढेको उनले बताए।

हाल अण्डा उत्पादनको लागत मूल्य प्रतिगोटा १९ रुपैयाँ १२ पैसा रहेको छ। यसअनुसार किसानको लागत मूल्य प्रतिक्रेट ५ सय ७४ रुपैयाँ ६ पैसा पर्न आउँछ। लागत मूल्य नजिक पुगेको अवस्थामा पुनः मूल्य घटेपछि किसान निरास बनेका थिए। तर हालको मूल्य वृद्धिले किसानमा पुनः आशा जागेको छ। सङ्घले बजारको अवस्था हेरी अण्डाको समर्थन मूल्य निर्धारण गर्दै आएको जनाएको छ।