चालु आर्थिक वर्षको पहिलो तीन महिनामा (साउन, भदौ र असोज) वैदेशिक रोजगारीका लागि देश छोड्ने नेपालीको संख्या उल्लेखनीय रूपमा बढेको छ। वैदेशिक रोजगार विभागका तथ्यांकअनुसार यस अवधिमा दुई लाख सात सय ११ नेपालीले रोजगारी अनुमति प्राप्त गरेका छन्, जुन अघिल्लो वर्षको सोही अवधिको तुलनामा २८.१४ प्रतिशतले बढी हो।

गत आर्थिक वर्षको सोही अवधिमा एक लाख ५६ हजार ६२५ नेपालीले वैदेशिक रोजगारका लागि अनुमति लिएका थिए। विभागका अनुसार यो तथ्यांकले अधिकृत रूपमा श्रम स्वीकृति लिएर गएका कामदारहरू मात्र समेटेको छ, जबकि वास्तविक संख्या अझ बढी हुन सक्ने अनुमान गरिएको छ।

अधिकारीहरूका अनुसार धेरै युवा भ्रमण भिसा लिएर विदेश गएपछि त्यहीँ रोजगारीमा संलग्न हुने प्रवृत्ति बढ्दो छ। साथै, अध्ययनका लागि विदेश गएका युवाहरूको संख्या यसमा समावेश गरिएको छैन।

कोभिड–१९ महामारीपछि वैदेशिक रोजगारीमा जाने नेपाली युवाको संख्या तीव्र रूपमा बढ्दै गएको छ। आर्थिक वर्ष २०८१/८२ मा मात्र ८ लाख ३९ हजार २६६ नेपालीले श्रम स्वीकृति पाएका थिए, जुन विगत तीन दशककै सबैभन्दा उच्च संख्या हो।

पछिल्ला वर्षहरूको तथ्यांक यस्तो छः

२०७८/७९: ६ लाख ३७ हजार १३३

२०७९/८०: ७ लाख ७१ हजार ३४७

२०८०/८१: ७ लाख ४१ हजार २९७

२०८१/८२: ८ लाख ३९ हजार २६६

यी तथ्यांकले देखाउँछ कि वैदेशिक रोजगार अहिले पनि नेपाली युवाका लागि मुख्य विकल्प बन्दै गएको छ।

यस प्रवृत्तिलाई विप्रेषण रकमले पनि पुष्टि गरेको छ। नेपाल राष्ट्र बैंकका अनुसार, आ.व. २०८१/८२ मा प्रेषण १९.२ प्रतिशतले बढ्दै १७ खर्ब २३ अर्ब रुपैयाँ पुगेको छ। चालु आर्थिक वर्षको पहिलो दुई महिनामै नेपालले ३ खर्ब ५२ अर्ब रुपैयाँ प्रेषण प्राप्त गरेको छ, जुन गत वर्षको सोही अवधिभन्दा ३३.१ प्रतिशतले बढी हो।

पछिल्ला तीन वर्षमा करिब २५ लाख नेपालीले रोजगारीका लागि देश छाडिसकेको अनुमान छ। हाल वार्षिक रूपमा करिब ७ लाख ६६ हजार कामदार वैदेशिक रोजगारमा जाने गर्छन्, जसमा करिब ६४ प्रतिशत नयाँ आप्रवासी कामदार र बाँकी ३६ प्रतिशत पुनः फर्केका कामदार रहेका छन्।

विश्लेषकहरूका अनुसार यो प्रवृत्ति देशभित्र पर्याप्त रोजगारी अवसर नहुँदा र आर्थिक अस्थिरताका कारण युवाहरू वैदेशिक रोजगारीमा निर्भर बन्न पुगेको संकेत हो।