मंगलवार , कार्तिक ४, २०८३
नेपाल प्रिमियर लिग (एनपीएल) को तेस्रो संस्करणमा पहिलोपटक डिसिजन रिभ्यू सिस्टम (डीआरएस) प्रयोग हुने भएको छ । नेपाल क्रिकेट संघ (क्यान) ले मंगलबार सामाजिक सञ्जालमार्फत आगामी सिजनमा डीआरएस प्रयोग गरिने जानकारी दिएको हो ।
डीआरएस क्रिकेटमा अम्पायरको निर्णय पुनरावलोकन गर्न प्रयोग गरिने प्रविधि हो । अम्पायरको निर्णयमा असहमति भएमा खेलाडीले निर्धारित प्रक्रियाअनुसार रिभ्यू माग्न सक्छन् । यसले खेलका विवादास्पद निर्णयको पुनः परीक्षण गर्न सहयोग पुर्याउँछ ।
.gif)
क्यानका अनुसार एनपीएलमा एलबीडब्ल्यू (लेग बिफोर विकेट) को रिभ्यूका लागि पूर्ण थ्रीडी बल ट्र्याकिङ प्रविधि प्रयोग गरिनेछ । यसका साथै रनआउट, स्टम्पिङ र नो बलसम्बन्धी निर्णयको पनि रिभ्यू गर्न सकिने व्यवस्था हुनेछ ।
एआईबाट ब्याटमा बल लागेको जाँच
एनपीएलमा प्रयोग हुने प्रविधिमार्फत ब्याटमा बल लागेको वा नलागेको पहिचान गर्न कृत्रिम बौद्धिकता (एआई) मा आधारित एज डिटेक्सन सुविधा पनि उपलब्ध हुनेछ । यसले बल ब्याटमा लागेको विषयमा निर्णय लिन सहयोग गर्नेछ ।
त्यस्तै, वाइड बलको उचाइसम्बन्धी निर्णयमा सहयोग पुग्ने प्रविधि, छक्काको दूरी र उचाइ मापन तथा बलिङसम्बन्धी विभिन्न विश्लेषणात्मक तथ्यांक पनि उपलब्ध हुने क्यानले जनाएको छ ।
निर्णयमा प्रविधिको प्रयोग बढ्ने
डीआरएसको प्रयोगले अम्पायरका निर्णय पुनरावलोकन गर्ने अवसर उपलब्ध गराउनुका साथै खेलको प्रविधिगत पक्षलाई पनि थप व्यवस्थित बनाउने अपेक्षा गरिएको छ । विशेषगरी एलबीडब्ल्यू, रनआउट, स्टम्पिङ र नो बलजस्ता निर्णयमा प्रविधिको प्रयोगले खेलको निष्पक्षता कायम गर्न सहयोग पुर्याउन सक्छ ।
एनपीएलको तेस्रो संस्करणमा डीआरएस लागू गर्ने निर्णयसँगै नेपाली फ्रेन्चाइज क्रिकेटमा निर्णय पुनरावलोकन तथा खेल विश्लेषणका आधुनिक प्रविधिको प्रयोग विस्तार हुने भएको छ ।
Be the first to comment!
© 2026 All right reserved to businessnewsnepal.com
Design & Developed By
प्रतिक्रिया दिनुहोस