सगरमाथा लुम्बिनी इन्स्योरेन्स कम्पनी लिमिटेडले आफ्नो २९ औं स्थापना दिवसको अवसरमा आज वीरगन्जस्थित आमाको माया छात्रावासमा एक विशेष कार्यक्रमको आयोजना गरेको छ ।

मानवीय सेवामा केन्द्रित यस कार्यक्रममा छात्रावासका विद्यार्थी भाइबहिनीहरूलाई विशेष भोजन गराउनुका साथै आवश्यक खाद्यान्न सामग्री वितरण गरेको कम्पनीले जनाएको छ । सलिकोका प्रदेश प्रमुख निशान्त कुमार लामिछानेको अध्यक्षतामा सम्पन्न भएको उक्त कार्यक्रममा नेपाल बीमा प्राधिकरणका सहायक निर्देशक शिव खनाल प्रमुख अतिथिको रूपमा उपस्थित थिए ।

यस्तै, निप्स वीरगन्ज च्याप्टरका अध्यक्ष तथा सिद्धार्थ प्रिमियर इन्स्योरेन्स लिमिटेडका प्रदेश प्रमुख बद्री बहादुर अधिकारी विशिष्ट अतिथि थिए । कार्यक्रममा यूनाइटेड अजोड इन्स्योरेन्स लिमिटेडका प्रदेश प्रमुख धिरज कुमार शर्मा, शिखर इन्स्योरेन्स कम्पनी लिमिटेडका प्रदेश प्रमुख सुरेश गुप्ता, र शिखर इन्स्योरेन्सका शाखा प्रमुख नितेश कुमार दास लगायतका अतिथिहरूको उपस्थिति थियो।

यस कार्यक्रमको सञ्चालन सलिको शाखा २ का प्रमुख दिलीप कुमार ढुङ्गेलले गरेका थिए । कम्पनीले आफ्नो २९ औं वार्षिकोत्सवको अवसरमा सामाजिक उत्तरदायित्व बहन गर्दै छात्रावासका बालबालिकाहरूको मुहारमा खुसी ल्याउन पाएकोमा खुसी व्यक्त गरेको छ।