जल तथा मौसम विज्ञान विभाग, मौसम पूर्वानुमान महाशाखाले हाल देशभर मनसुनी प्रणाली र स्थानीय वायुको प्रभाव सक्रिय रहेको जनाएको छ। देशभरको मौसम साधारणतया बदली रहेको विभागले जनाएको छ।

महाशाखाका अनुसार आज दिउँसो कोशी, बागमती, गण्डकी र लुम्बिनी प्रदेशका पहाड तथा तराईका केही भूभागहरूमा मध्यम वर्षा हुने सम्भावना छ। साथै, लुम्बिनी प्रदेशको तराई, कर्णाली र बागमती प्रदेशको पहाडी क्षेत्रमा एकदुई स्थानमा भारी वर्षा हुन सक्ने उल्लेख गरिएको छ।

आज राति पनि देशभर सामान्यतया बदली रहने र कोशी, गण्डकी, लुम्बिनी तथा मधेस प्रदेशका विभिन्न स्थानहरूमा मध्यमदेखि भारी वर्षाको सम्भावना रहेको विभागले जनाएको छ।

यसैबीच, राष्ट्रिय विपद् जोखिम न्यूनीकरण तथा व्यवस्थापन प्राधिकरणले कोशी, मधेस, बागमती, गण्डकी र लुम्बिनी प्रदेशमा अत्यावश्यक अवस्थाबाहेक आगामी चार दिनसम्म लामो दूरीको यात्रा नगर्न सर्वसाधारणलाई आग्रह गरेको छ।

असोज १७ देखि २० गतेसम्मको लागि विशेष सतर्कता

प्राधिकरणका अनुसार जल तथा मौसम विज्ञान विभागले असोज १७ देखि २० गतेसम्म विभिन्न जिल्लामा भारी वर्षाको चेतावनी सार्वजनिक गरेकाले संभावित बाढी, पहिरो तथा आकस्मिक घटना रोक्न सतर्कता आवश्यक छ।

बाढीको जोखिम उच्च

प्राधिकरणले बागमती, कमला र कोशी नदीमा पानीको बहाव खतरा तहसम्म पुग्न सक्ने भन्दै विशेष सावधानी अपनाउन आग्रह गरेको छ।

त्यस्तै, बागमती प्रदेशको काठमाडौं उपत्यका, काभ्रेपलाञ्चोक, सिन्धुपाल्चोक, रसुवा, मकवानपुर, चितवन; कोशी प्रदेशको सङ्खुवासभा, ताप्लेजुङ, इलाम, झापा, मोरङ; मधेस प्रदेशको बारा, पर्सा, सर्लाही, रौतहट लगायत आसपासका जिल्लाबाट बग्ने ससाना नदीमा आकस्मिक बाढीको जोखिम उच्च रहेको विज्ञप्तिमा उल्लेख छ।

प्राधिकरणले सबै नागरिक, स्थानीय तह र सरोकारवाला निकायलाई समयमै पूर्वतयारी गर्न, सूचनामा अपडेट रहन र आवश्यक सतर्कता अपनाउन आग्रह गरेको छ।