हिमालपारिको जिल्ला भनेर चिनिने मनाङको प्रसिद्ध पर्यटकीय गन्तव्य तिलिचो बेस क्याम्पमा नेपाल टेलिकमले फोरजी सेवा सञ्चालनमा ल्याएको छ।
शुक्रबारदेखि औपचारिक रूपमा सुरु गरिएको सो सेवाको शुभारम्भ अवसरमा सञ्चार तथा सूचना प्रविधिमन्त्री जगदीश खरेलले टेलिकमका फिल्ड इन्जिनियर निरज गुप्तासँग भिडियोकलमार्फत कुराकानी गर्दै तिलिचो क्षेत्रमा फोरजी सेवा सुरु भएकोमा खुशी व्यक्त गरे।
मन्त्री खरेलले दुर्गम क्षेत्रमा सञ्चार पहुँच विस्तारका लागि सरकार निरन्तर काम गरिरहेको बताउँदै, “आज तिलिचो क्षेत्रमा फोरजी सेवा सुरु हुनु सरकारको डिजिटल पहुँच विस्तार प्रयासको ठोस उपलब्धि हो,” भने।
उनले टेलिकम, स्थानीय जनप्रतिनिधि र समुदायलाई धन्यवाद दिंदै, “दुर्गम क्षेत्रमा भ्वाइस र डेटा सेवा पुर्याउने लक्ष्यअनुसार काम भइरहेको छ, यसले स्थानीयवासी र पर्यटक दुबैलाई सुविधा पुर्याउनेछ,” भने।
नेपाल टेलिकमले तिलिचो बेस क्याम्पमा नयाँ बीटीएस (Base Transceiver Station) स्थापना गरी माइक्रोवेभ प्रविधिमार्फत टुजी र फोरजी सेवा सञ्चालनमा ल्याएको जनाएको छ। करिब ४,३५० मिटर उचाइमा रहेको तिलिचोताल जाने रुटमा सेवा विस्तारसँगै अब त्यहाँका स्थानीय र पदयात्रीहरूले स्थिर मोबाइल नेटवर्क र इन्टरनेट सुविधा पाउने भएका छन्।
यससँगै, टेलिकमले दोलखाको च्छो–रोल्पा ट्रेकिङ रुटको अन्तिम बस्ती नागाउँमा पनि भी–एसएटी प्रविधिमार्फत भ्वाइस सेवा सञ्चालनमा ल्याएको छ।
४,१९० मिटरको उचाइमा रहेको नागाउँ साइटमार्फत च्छो–रोल्पा, दूध–कुण्ड, यालुङ बेस क्याम्प र टासी–लेप्चा पास बेस क्याम्प क्षेत्रका स्थानीय र पर्यटकहरूलाई सञ्चार सम्पर्क तथा आपतकालीन उद्धार कार्यमा सुविधा पुग्ने टेलिकमले जनाएको छ।
यो खबर पढेर तपाईलाई कस्तो महसुस भयो ?
प्रतिक्रिया
सम्बन्धित खवर
