रसुवामा आएको विनाशकारी बाढी तथा पहिरोका कारण हालसम्म १ हजार ३५७ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ २३ गते दिउँसो १ बजेसम्मको अद्यावधिक विवरण सार्वजनिक गर्दै उक्त तथ्यांक पुष्टि गरेको हो।

प्राधिकरणका अनुसार विभिन्न प्रभावित जिल्लाबाट ठूलो संख्यामा शव तथा मानव अंग फेला परेका छन्। चितवनमा ३६३, नवलपरासी पूर्वमा २२३, नवलपरासी पश्चिममा २२२, नुवाकोटमा १९७, रसुवामा १६९, धादिङमा ७०, गोरखामा ७५ र तनहुँमा ३८ वटा शव तथा मानव अंग फेला परेका छन्। फेला परेका शवमध्ये हालसम्म १०२ जनाको मात्र सनाखत भएको छ।

बाढीपछि अझै ५ हजार ३२६ जना सम्पर्कविहीन रहेको प्राधिकरणले जनाएको छ। रसुवा जिल्लाबाट मात्रै २ हजार ८६० जना बेपत्ता छन्। रसुवाबाट बेपत्ता हुनेमा १ हजार ३९३ स्थानीय, अन्य जिल्लाका १ हजार २८६ जना तथा नेपाली सेना, नेपाल प्रहरी, सशस्त्र प्रहरी, सरकारी कर्मचारी र बैंक तथा वित्तीय संस्थाका कर्मचारीसमेत रहेका छन्।

यस्तै, नुवाकोटबाट करिब १ हजार ९८१ नेपाली नागरिक र ५८७ जना विदेशी पर्यटक अझै सम्पर्कविहीन रहेको प्राधिकरणले जनाएको छ।

विपद्पछि तीव्र पारिएको खोज तथा उद्धार अभियानबाट हालसम्म १३ हजार ५८३ जनाको सकुशल उद्धार गरिएको छ। बाढी तथा पहिरोमा परी घाइते भएका ६ हजार ८२७ जनाको उपचार भइरहेको छ। उपचाररत घाइतेमध्ये २४२ जना अस्पतालबाट डिस्चार्ज भइसकेका छन्।

उद्धार तथा राहत कार्यमा नेपाली सेना, नेपाल प्रहरी र सशस्त्र प्रहरी बलका गरी २१ हजार ४०२ सुरक्षाकर्मी परिचालन गरिएको छ। नेपाली सेनाका ९ हजार २८७, नेपाल प्रहरीका ७ हजार ९१२ र सशस्त्र प्रहरीका ४ हजार २०३ जना सुरक्षाकर्मी प्रभावित क्षेत्रमा खटिएका छन्।

हवाई उद्धार तथा राहतका लागि नेपाली सेनाले १ हजार १५७ पटक, निजी क्षेत्रले १२९ पटक र सशस्त्र प्रहरीले २०३ पटक हेलिकप्टर उडान गरेका छन्।

विस्थापित नागरिकलाई रसुवामा ६६९, नुवाकोटमा २ हजार ६५१ र धादिङमा २१३ गरी कुल ३ हजार ५३३ जनालाई ३९ वटा होल्डिङ सेन्टरमा राखिएको छ।

सरकारले रसुवा र नुवाकोटलाई १–१ करोड रुपैयाँ, धादिङलाई ५० लाख रुपैयाँ तथा प्रभावित १५ स्थानीय तहलाई १३ करोड ५० लाख रुपैयाँ नगद राहत उपलब्ध गराएको छ।

प्रभावित क्षेत्रमा ५० हजार लिटर डिजेल, १८ हजार लिटर पेट्रोल, १८ हजार लिटर हवाई इन्धन र ४५७ सिलिन्डर ग्यास पठाइएको छ। प्रभावित नागरिकको मनोसामाजिक सहयोगका लागि स्वास्थ्य मन्त्रालयले १५० भन्दा बढी जनशक्ति परिचालन गरेको जनाएको छ।

विद्युत् आपूर्तितर्फ धादिङमा ९९.८ प्रतिशत, नुवाकोटमा ९६.७ प्रतिशत र रसुवामा ७८ प्रतिशत घरधुरीमा विद्युत् सेवा पुनः सञ्चालनमा आएको प्राधिकरणले जनाएको छ।