ताजा
लोकप्रिय
सञ्चालनमा रहेका १४ निर्जीवन बीमा कम्पनीले गत आर्थिक वर्ष २०८२/८३ मा ५० अर्ब ६० करोड रुपैयाँभन्दा बढी बीमा शुल्क आर्जन गरेका छन् । कम्पनीहरूले अघिल्लो आर्थिक वर्षको तुलनामा कुल बीमा शुल्क आर्जन १५.१२ प्रतिशतले वृद्धि गरेका हुन् ।
अघिल्लो आर्थिक वर्ष २०८१/८२ मा १४ निर्जीवन बीमा कम्पनीले कुल ४३ अर्ब ९५ करोड ८७ लाख रुपैयाँ बीमा शुल्क आर्जन गरेका थिए । गत आर्थिक वर्षमा यो रकम बढेर ५० अर्ब ६० करोड ३१ लाख रुपैयाँ पुगेको छ ।
कुल बीमा शुल्क आर्जनका आधारमा शिखर इन्स्योरेन्स अग्रस्थानमा रहेको छ । कम्पनीले गत आर्थिक वर्षमा ६ अर्ब ५१ करोड १२ लाख रुपैयाँभन्दा बढी बीमा शुल्क आर्जन गरेको छ । अघिल्लो आर्थिक वर्षमा कम्पनीले ५ अर्ब ७९ करोड ४२ लाख रुपैयाँ बीमा शुल्क आर्जन गरेको थियो । शिखर इन्स्योरेन्सको बीमा शुल्क आर्जन १२.३८ प्रतिशतले बढेको छ ।
सगरमाथा लुम्बिनी इन्स्योरेन्स ५ अर्ब ४२ करोड २२ लाख रुपैयाँभन्दा बढी बीमा शुल्क आर्जन गर्दै दोस्रो स्थानमा रहेको छ । कम्पनीको बीमा शुल्क आर्जन अघिल्लो आर्थिक वर्षको तुलनामा ८.४० प्रतिशतले बढेको छ ।
त्यस्तै, हिमालयन एभरेष्ट इन्स्योरेन्सले ५ अर्ब ३७ करोड ४१ लाख रुपैयाँभन्दा बढी बीमा शुल्क आर्जन गरेको छ । कम्पनीको बीमा शुल्क आर्जन ३१.०६ प्रतिशतले बढेको छ ।
आईजीआई प्रुडेन्सियल इन्स्योरेन्सले ४ अर्ब ५५ करोड ११ लाख रुपैयाँभन्दा बढी बीमा शुल्क आर्जन गर्दा सिद्धार्थ प्रिमियर इन्स्योरेन्सले ४ अर्ब ३१ करोड ७४ लाख रुपैयाँभन्दा बढी बीमा शुल्क आर्जन गरेको छ ।
त्यस्तै, एनएलजी इन्स्योरेन्सले ४ अर्ब २० करोड ७९ लाख रुपैयाँभन्दा बढी बीमा शुल्क आर्जन गरेको छ । कम्पनीले अघिल्लो आर्थिक वर्षको तुलनामा बीमा शुल्क आर्जन ३७.३० प्रतिशतले बढाएको छ । यो समीक्षा अवधिमा बीमा शुल्क आर्जन वृद्धिका आधारमा सबैभन्दा अगाडि रहेको कम्पनी हो ।
नेको इन्स्योरेन्सले ३ अर्ब ६५ करोड ५० लाख रुपैयाँभन्दा बढी, द ओरिएन्टल इन्स्योरेन्सले ३ अर्ब २५ करोड २१ लाख रुपैयाँभन्दा बढी र युनाइटेड अजोड इन्स्योरेन्सले ३ अर्ब ११ करोड ६२ लाख रुपैयाँभन्दा बढी बीमा शुल्क आर्जन गरेका छन् ।
त्यस्तै, सानिमा जीआईसी इन्स्योरेन्सले ३ अर्ब ८ करोड २० लाख रुपैयाँभन्दा बढी बीमा शुल्क आर्जन गर्दा नेपाल इन्स्योरेन्सले २ अर्ब २१ करोड ६२ लाख रुपैयाँभन्दा बढी र प्रभु इन्स्योरेन्सले २ अर्ब २ करोड २८ लाख रुपैयाँभन्दा बढी बीमा शुल्क आर्जन गरेका छन् ।
राष्ट्रिय बीमा कम्पनीले १ अर्ब ५८ करोड ३७ लाख रुपैयाँभन्दा बढी र नेशनल इन्स्योरेन्सले १ अर्ब २९ करोड ७ लाख रुपैयाँभन्दा बढी बीमा शुल्क आर्जन गरेका छन् ।
समग्रमा निर्जीवन बीमा क्षेत्रको बीमा शुल्क आर्जनमा वृद्धि देखिए पनि कम्पनीअनुसार वृद्धिदर भने फरक–फरक रहेको तथ्याङ्कले देखाएको छ । एनएलजी इन्स्योरेन्सले ३७.३० प्रतिशत र हिमालयन एभरेष्ट इन्स्योरेन्सले ३१.०६ प्रतिशत वृद्धि हासिल गरेका छन् भने सिद्धार्थ प्रिमियर इन्स्योरेन्सको वृद्धि सबैभन्दा न्यून ०.१७ प्रतिशत रहेको छ ।
