ताजा
लोकप्रिय
नेशनल लाइफ इन्स्योरेन्स कम्पनीले २०८३ वैशाख महिनाको मासिक योजनाअनुसार उत्कृष्ट कार्यसम्पादन गर्दै निर्धारित लक्ष्य पूरा गर्न सफल अभिकर्ताहरूका लागि प्रशिक्षण तथा सांस्कृतिक कार्यक्रम सम्पन्न गरेको छ ।
ललितपुरस्थित होटल रोयल टुलिपमा आयोजित कार्यक्रममा कम्पनीका प्रमुख कार्यकारी अधिकृतले पानसमा दीप प्रज्वलन गरी कार्यक्रमको उद्घाटन गरेका थिए । कार्यक्रममा कम्पनीका विभागीय प्रमुख, विभिन्न शाखाका शाखा प्रमुख, वरिष्ठ व्यवसाय प्रबन्धक, प्रबन्धक तथा अभिकर्तासहित करिब ३०० जनाको सहभागिता रहेको कम्पनीले जनाएको छ ।
कार्यक्रमलाई सम्बोधन गर्दै कम्पनीका प्रमुख कार्यकारी अधिकृतले आर्थिक वर्ष २०८३/८४ मा प्रथम बीमाशुल्कलगायत समग्र सूचकमा कम्पनीले उत्कृष्ट प्रदर्शन गर्न सफल भएको बताए । उनले कम्पनीको सफलतामा योगदान पुर्याउने नियमनकारी निकाय, ग्राहक, अभिकर्ता तथा कम्पनीसँग प्रत्यक्ष र अप्रत्यक्ष रूपमा जोडिएका सबैप्रति आभार व्यक्त गरे ।
नयाँ आर्थिक वर्षको शुभकामना दिँदै उनले ग्राहकलाई थप प्रभावकारी सेवा तथा सुविधा प्रदान गर्न कम्पनी अझ जिम्मेवार भएर अघि बढ्ने बताए । साथै, कम्पनीको अभिकर्ता सञ्जाललाई थप सुदृढ बनाउनेतर्फ विशेष ध्यान दिइने उल्लेख गर्दै त्यसका लागि सबैको निरन्तर सहयोग आवश्यक रहेको बताए ।
कार्यक्रममा आमन्त्रित अभिकर्ताहरूलाई चर्चित प्रशिक्षक काजिम रजाले अन्तर्राष्ट्रिय बीमा क्षेत्रको प्रतिष्ठित उपाधि एमडिआरटीको लक्ष्य हासिल गर्न आवश्यक कार्ययोजना तथा अपनाउनुपर्ने व्यावसायिक रणनीतिबारे प्रशिक्षण दिएका थिए । उनले विभिन्न उदाहरणमार्फत अभिकर्ताहरूलाई लक्ष्य प्राप्तिका लागि आवश्यक सीप, कार्यशैली र व्यावसायिक दृष्टिकोणबारे प्रशिक्षण प्रदान गरेका थिए ।
प्रशिक्षणसँगै कार्यक्रमलाई सांस्कृतिक तथा मनोरञ्जनात्मक प्रस्तुतिले समेत विशेष बनाएको थियो । कार्यक्रममा स्ट्यान्डअप कमेडियन सुमन कार्कीले हास्य प्रस्तुति दिएका थिए भने चर्चित कलाकार रामचन्द्र काफ्ले र जुनु रिजालले सांगीतिक प्रस्तुति दिएका थिए ।
कार्यक्रमको मुख्य आकर्षणका रूपमा चर्चित गायक दीपक बज्राचार्य एन्ड रिदम ब्याण्डले प्रत्यक्ष सांगीतिक प्रस्तुति दिएका थिए । साथै, डिजे अमुको प्रस्तुतिमा सहभागी अभिकर्ताहरूले मनोरञ्जन लिएका थिए ।
कम्पनीले उत्कृष्ट कार्यसम्पादन गर्ने अभिकर्तालाई प्रोत्साहन, क्षमता अभिवृद्धि तथा व्यावसायिक विकासमा सहयोग पुर्याउने उद्देश्यले यस्ता कार्यक्रमलाई निरन्तरता दिँदै आएको जनाएको छ ।
