साताको पहिलो कारोबार दिन नेपाल स्टक एक्सचेन्ज (नेप्से) परिसूचक सामान्य अंकले घटेर बन्द भएको छ। अघिल्लो कारोबार दिन शुक्रबार बढेको बजार सोमबार भने १.२० अंकले ओरालो लाग्दै २,६८४.३३ विन्दुमा कायम भएको हो।

यद्यपि, बजार परिसूचकमा सामान्य गिरावट आए पनि कारोबार रकममा भने उल्लेखनीय वृद्धि भएको छ। गत शुक्रबार ३ अर्ब ७५ करोड रुपैयाँको कारोबार भएको बजारमा सोमबार ३४९ कम्पनीको १ करोड १४ लाख ४९ हजार कित्ता शेयर ६३ हजार ६४८ पटक किनबेच हुँदा कुल कारोबार रकम ४ अर्ब ५७ करोड २० लाख ८४ हजार रुपैयाँ पुगेको छ।

यस दिन सेन्सेटिभ परिसूचक ०.४९ अंकले बढेको छ भने फ्लोट परिसूचक ०.१४ अंक र सेन्सेटिभ फ्लोट परिसूचक ०.१७ अंकले उकालो लागेको छ।

बजार सामान्य घटे पनि केही कम्पनीको शेयरमा उच्च वृद्धि देखिएको छ। एभरेष्ट कलर लिमिटेडको शेयर लगातार दोस्रो दिन पनि सकारात्मक सर्किटमा कारोबार हुँदै १९६ रुपैयाँ ३० पैसाले बढेर १ हजार ५०५ रुपैयाँ ६० पैसा पुगेको छ। त्यस्तै सप्तकोशी डेभलपमेन्ट बैंकको शेयर मूल्य ११.५ प्रतिशतभन्दा बढी र महुली लघुवित्त वित्तीय संस्थाको शेयर मूल्य ७ प्रतिशतभन्दा बढीले बढेको छ।

विपरीत रूपमा रिलायन्स स्पिनिङ मिल्सको शेयर मूल्य सबैभन्दा धेरै ७.४० प्रतिशतले घटेको छ।

कारोबार रकमका आधारमा पनि रिलायन्स स्पिनिङ मिल्स नै अग्रस्थानमा रह्यो। कम्पनीको २७ करोड ६२ लाख रुपैयाँ बराबरको शेयर कारोबार भएको छ। त्यसपछि रिडी पावर कम्पनीको करिब २१ करोड रुपैयाँ तथा ग्लोबल आइएमई बैंकको १९ करोड रुपैयाँभन्दा बढीको शेयर कारोबार भएको छ।

उपसमूहगत प्रदर्शन हेर्दा १३ मध्ये ८ उपसमूह हरियालीमा बन्द भएका छन्। बैंकिङ, विकास बैंक, होटल तथा पर्यटन, जलविद्युत, जीवन बीमा, लघुवित्त, म्युचुअल फन्ड र निर्जीवन बीमा उपसमूहका परिसूचक बढेका छन्। वित्त, व्यापार, उत्पादन तथा प्रशोधन, लगानी र अन्य उपसमूहका परिसूचक भने सामान्य घटेका छन्।

बजार विश्लेषकहरूका अनुसार परिसूचकमा सामान्य करेक्सन आए पनि कारोबार रकम बढ्नु र अधिकांश उपसमूहमा सुधार देखिनुले बजारमा लगानीकर्ताको सक्रियता कायम रहेको संकेत गर्छ।