नेपाल कम्युनिष्ट पार्टी (माओवादी) का महासचिव नेत्रविक्रम चन्द ‘विप्लव’ ले वर्तमान सरकारको कार्यशैलीप्रति जनतामा असन्तुष्टि, आक्रोश र पश्चाताप बढ्दै गएको दाबी गरेका छन्। उनले विशेषगरी रास्वपा नेतृत्वको सरकार र काठमाडौं महानगरका प्रमुख वालेन्द्र शाह (बालेन) को नेतृत्वप्रति समेत जनविश्वास कमजोर हुन थालेको बताएका छन्।
बुधबार काठमाडौंमा आयोजित पत्रकार सम्मेलनमा बोल्दै विप्लवले परिवर्तनको अपेक्षासहित जनताले निर्वाचित गरेको सरकार जनअपेक्षा अनुरूप काम गर्न नसकेको आरोप लगाए। उनले अहिले सरकारको कामप्रति गम्भीर प्रश्न उठ्न थालेको र जनतामा निराशा बढ्दै गएको दाबी गरे।
'जनतामा असन्तुष्टि, आक्रोश र एक प्रकारले रास्वपा नेतृत्वको सरकार बनेकोप्रति गम्भीर प्रश्नहरू उठेका छन्,' उनले भने, 'परिवर्तनको आशा बोकेर आएको सरकार अपेक्षाअनुसार अघि बढ्न सकेन।'
विप्लवले काठमाडौं महानगरका प्रमुख बालेन शाहप्रति पनि जनधारणा परिवर्तन हुन थालेको टिप्पणी गरे। उनका अनुसार सुरुमा ठूलो आशा गरिएका नेतृत्वबाट अपेक्षित परिणाम नआएपछि समर्थकहरूमै निराशा देखिन थालेको छ।
'बालेन नेतृत्वप्रति पनि मानिसहरूको धारणा उल्टिन थालेको छ,' उनले भने, 'रास्वपाका सदस्य र समर्थकहरूले समेत अहिले पश्चाताप व्यक्त गर्न थालेका छन्।'
उनले विद्रोह र परिवर्तनको नारासहित निर्वाचन जितेर आएको नेतृत्वले जनअपेक्षा पूरा गर्न नसकेको दाबी गर्दै नयाँ पुस्तामा समेत निराशा बढ्दै गएको बताए।
'विद्रोहको भावनासहित चुनावबाट आएको सरकार जसरी चल्नुपर्थ्यो, त्यो दिशामा जान सकेन,' विप्लवले भने, 'जनताका अपेक्षा फेरि पनि चकनाचुर भएका छन्। नयाँ पुस्तामा असन्तुष्टि बढ्दै गएको अवस्था हामीले देखिरहेका छौं।'
विप्लवले वर्तमान राजनीतिक परिस्थितिले वैकल्पिक राजनीतिक बहसको आवश्यकता अझ स्पष्ट बनाएको पनि उल्लेख गरे।
प्रतिक्रिया दिनुहोस