ताजा
लोकप्रिय
ओपनएआईले च्याटजिपिटीलाई केवल मोबाइल एपको सीमाभित्र राख्न नचाहेको संकेत दिएको छ। कम्पनीले च्याटजिपिटीलाई नै अपरेटिङ सिस्टम (ओएस) का रूपमा विकास गर्ने महत्वाकांक्षी योजना अघि सारेको छ। यसको अर्थ, भविष्यमा प्रयोगकर्ताले साना–ठूला कामका लागि छुट्टाछुट्टै धेरै एप खोलिरहनु नपर्ने हुन सक्छ। च्याटजिपिटी नै सबै कामको केन्द्र बन्नेछ।
यो योजना कार्यान्वयन गर्न ओपनएआईले ग्लेन कोट्सलाई एप प्लेटफर्म प्रमुखको जिम्मेवारी दिएको छ। उनको मुख्य उद्देश्य च्याटजिपिटीलाई पूर्ण रूपमा ओएसमा रूपान्तरण गर्नु हुनेछ।
जसरी अहिले स्मार्टफोनमा एन्ड्रोइड वा आइओएस र कम्प्युटरमा विन्डोज जस्ता अपरेटिङ सिस्टम हुन्छन्, त्यस्तै ओएस कुनै पनि उपकरणको आधारभूत सफ्टवेयर हो। ओएस बिना फोन वा कम्प्युटर केवल एउटा बक्स मात्र हुन्छ। ओएसले प्रयोगकर्ताको क्लिक, टाइप र आदेशलाई हार्डवेयरसम्म पुर्याएर उपकरण चलाउने काम गर्छ।
ओपनएआईका च्याटजिपिटी प्रमुख निक टर्लीले आगामी वर्षहरूमा च्याटजिपिटी पूर्ण रूपमा रूपान्तरण हुने बताएका छन्। उनका अनुसार, च्याटजिपिटीले ओएस जस्तै काम गर्ने दिशामा कम्पनी अघि बढिरहेको छ।
हालै च्याटजिपिटीमा देखिएका परिवर्तनहरूले पनि यही संकेत गर्छन्। अब यो केवल च्याट गर्ने माध्यम मात्र रहेन। क्यानभा, स्पोटीफाई र ट्रिपएडभाइजर जस्ता लोकप्रिय एपहरू सिधै च्याटजिपिटीभित्र एकीकृत भइसकेका छन्, जसले यसलाई अल–इन–वन प्लेटफर्म तर्फ लैजाँदैछ।
अपरेटिङ सिस्टम चलाउन हार्डवेयर आवश्यक पर्ने भएकाले, ओपनएआईले नयाँ एआई उपकरण विकास गर्न प्रसिद्ध आईफोन डिजाइनर जोनी इभसँग सहकार्य गरिरहेको रिपोर्टहरूमा उल्लेख छ। यो नयाँ एआई डिभाइस सन् २०२७ सम्ममा बजारमा आउन सक्ने अनुमान गरिएको छ।
यदि यो योजना सफल भयो भने, प्रविधि प्रयोग गर्ने हाम्रो तरिका नै पूर्ण रूपमा परिवर्तन हुन सक्नेछ।
