ताजा
लोकप्रिय
अर्थमन्त्री डा. स्वर्णिम वाग्लेले आज विभिन्न उत्पादनमूलक उद्योगका उद्योगपतिसँग बजेट कार्यान्वयनका विषयमा छलफल गर्ने भएका छन्।
अर्थमन्त्रीको सचिवालयका अनुसार छलफल दिउँसो ३ बजे अर्थ मन्त्रालयमा हुनेछ। बैठकमा नेपालमा उत्पादनमूलक उद्योग सञ्चालन गरी अर्थतन्त्रमा महत्वपूर्ण योगदान पुर्याउँदै आएका झण्डै तीन दर्जन उद्योगपतिहरू सहभागी हुनेछन्।
छलफलमा चालु आर्थिक वर्षको बजेट कार्यान्वयन, उत्पादनमूलक उद्योगका समस्या तथा उद्योग क्षेत्रमार्फत अर्थतन्त्रमा थप योगदान बढाउने विषयमा केन्द्रित रहेर छलफल हुने बताइएको छ।
बैठकमा अर्थमन्त्री वाग्लेसहित अर्थसचिव डा. घनश्याम उपाध्याय, उद्योग, वाणिज्य तथा आपूर्ति सचिव नारायणप्रसाद दवाडीसहित अर्थ मन्त्रालयका महत्वपूर्ण महाशाखा तथा विभागका अधिकारीहरूको सहभागिता रहनेछ।
सरकारले निजी क्षेत्रको सहभागिता र उत्पादनमूलक उद्योगको विस्तारलाई प्राथमिकतामा राख्दै आएको अवस्थामा अर्थमन्त्री र उद्योगपतिबीच हुने छलफललाई बजेट कार्यान्वयनमा निजी क्षेत्रका सुझाव समेट्ने महत्वपूर्ण अवसरका रूपमा हेरिएको छ।
